Sorkar inrelbawlna fel lo

Assembly session zawh takah sorkar hnathawkte'n House-a thusawi an ngaih pawimawh tâwk loh thu leh MLA-te an ngaih pawimawh loh ṭhin thu sawi lan a ni. Chief minister Lal Thanhawla chuan sorkar hnathawkte awm dan chuan sokar kalphung a tilang chiang hle tih a sawi a, chu chu sorkar leh a enkawltu amah chief minister mualphona a nih thu a sawi.

Mizoramah hian tun hnaiah sorkar hnathawkte discipline hi a tlahniam ta hle mai a, hei hi tun hma chuan a ni ngai lo. Tun hma deuh chuan sorkar hnathawk hi sorkar thu angin an awm a, tunah chuan hlauh nei lo ang maiin an khawsa ta ni berin a lang a, a pawi hle. Chutihlaiin sorkar hnathawkte discipline a tlachhe ta a nih chuan a mawhphurtu chu sorkarna chelhtu an ni lo tlei lo.

Tlemlai deuh aṭang khan sorkar hnathawk zingah sorkar pawh hlau lo, mipui pawh zah lo, politician ang maia khawsa ngam hialte pawh an lo chhuak a; NGO hruaitu an nih phei chuan an eizawnna sorkar hna lam aiin NGO-ah an rilru an pe zawk a, sorkar kalh zawnga khawsak pawh an hnial ta lo. Heng thil a thlen chhan chu 'hlauh tur' an hmuh loh vang a ni thei a, a hrem theitu lamin an en liam mai mai ṭhin vang a ni ngei ang.

'Zilh loh fa' tih ṭawngkam ang maiin sorkar hnathawkte zingah hrem tawk an tlem a, hei vang hian an inthlahdah tial tial a ang hle. Chief secretary kan neih apiangin sorkar office kai hun vawn dik an ngaih pawimawh thu an sawi a, tun thlengin Aizawla traffic jam hun chu office ṭan hnu darkar khat bawr vel a la ni a, a hun taka office thleng hi an la tlem pharh a ni.

Chief minister-in Assembly House-a a sawi meuh pawh an ngaihthah ngam tawh chuan sorkar office inrelbawlna a fel lo hle tih a chiang a, a mawhphurhna la ngamtu chief minister hian a siam ṭhat hna a thawh ngam a ngai a, sorkar hotu lu ber aṭangin sorkar hnathawk inrelbawlna siam ṭhat hna hi ṭan ni rawh se.