Sikul khar leh zirlaite

Mizoram sorkarin January 15, 2021-a sikul lut ṭan tura ruahmanna a siam chu a ṭhulh leh niin School Education minister chuan a sawi a; mithiam zawkte an rawn hnuah sikul kal ṭan hun hi sawn hlat a ni a, rua­hmanna thar siam a ni ang. 

Covid-19 avanga kan harsatna tawh hian kawng hrang hrangin min nghawng a, a nghawng nat zinga mi chu sikul naupangte hi an ni ngei ang. Khawpuiah leh hmun dang ṭhenkhatah online-a class kal theih ni bawk mah se thingtlang khaw kilkhawr zawkah chuan a remchang ve lo a; in lamah nu leh pa ṭhen­khatin an fate an zirna an en pui thiam lo bawk nen, a tawpa tuartu chu zirlaite an ni. 

An exam dan tur a chiang hleithei lo a, an zir dan a chiangkuang lo bawk a, hei hian zirlaite hi nasa takin a nghawng ang. Hetih rual hian sorkar lam emaw, sikul neitu lam emaw hi dem theih an ni lo a, kan zavaiin Covid-19 avangin vanduaina kan tawk a ni ber mai. 

Hetihlai hian mahni thiam ang anga in lama fate zirlai enpui emaw, a enpui thiam lo tan pawh sikul khar a nih chhunga an hun hman dan tur thiam taka duan­sak erawh tihmak­mawh a ni; thingtlang lam pawhin mah­ni chhungkua leh khaw milin naupangte tih tur tawk tuksak thiam a pawimawh hle ang. 

Covid-19 avanga harsatna kan tawh mêk hian zirlaite hmalam hunah nghawng a neih nat lohna turin nu leh pain mahni phak tawk leh thiam chinah theihtawp chhuah ila, sikul khar chhung hian mahni fate enkawl danah ṭan i la thar ang u.