Sorkar leh CSS hnuaia thawkte

Centrally sponsored scheme hnuaia Mizoram sorkara thawkte chuan sorkara an thil phût tihhlawhtling tura sorkar kar nan ni sarih chhung hna an thawk lo a, ZPM Coordination Committee-in thuchhuak an neih hnuah leh DPAR Minister nen an inbiak hnuah September 19, 2025 tlai khan nawrh an titawp.

CSS hnuaia thawkte leh sorkar lamah khawi zawk nge dika dik lo, tih chu eng pawh ni se, nawrh tihtawp a nih theihna tura hmalak a ni hi a lawmawm a; CSS hnuaia thawkte'n sorkar hmalakna ngaichâng chunga nawrh an titawp hi a lawmawm. CSS hnuaia thawkte thil phût hi danin a phal chinah tipuitling turin sorkarin dan ang takin chak takin hma la se.

CSS hnuaia thawkte zingah dan ang taka lak–advertisement chhuah leh DPC paltlang thlapa lak ṭhahnem tak an awm. Chutih laiin, tun hma aṭang tawhin CSS hi sorkar hotute leh official ten an duhsak zawngte an thun tamnaa ngaih a ni ṭhin; hei hi mipui nâwlpui hmuh dan a ni pawhin a hriat.

Minister leh officer emaw ten tun hma aṭang tawhin CSS-ah an duhsak zawngte an thun ṭhin nia sawi hi a dikin a rinawm a; mi tam tak chuan hminghmerh pawha sawi tur an nei nual mai thei. Duhsak vang liau liaua CSS hnuaia thawk tura lak, advertisement chhuah loh leh DPC paltlang loha lakte chu dan anga lâk tia sawi theih an ni lo ang. Hei hi sorkar mai ni loin, mipui nâwlpui ngaihdan pawh a nih a rinawm.

Mizoram sorkarin CSS hnuaia thawkte dah ngheh theihna turin Mizoram Regularisation of CSS Employee Scheme, 2024 a siam a, mi ṭhenkhatah hman a ni tawh. Sorkarin a hman tawh si chuan, CSS hnuaia thawk, Scheme-in dah ngheh theih a tih china awmte chu dah ngheh an nih theih nan chak taka bawhzui ni se. Dan anga dah ngheh theih leh dah ngheh theih lohte pawh sorkarin dik takin thliar se a ṭha hle ang.

Sorkarin dah nghet turin hma a la a nih pawhin, Scheme-in a sawi anga dah ngheh theih china awm zawng zawng dah ngheh nghal vek theih a ni dawn lo; sorkar sum dinhmunin tlin ngaihna a awm lo. Hei hi CSS hnuaia thawkte pawhin an hriat a ṭul a, a páwng a taka sorkar nawr loin, dawhthei takin an nghak ve tur a ni ang.