Graduate zo tharte hmalam hun

Mizoram University chuan tun hnai khan kumin May thlaa degree course final exam result a tichhuak a, graduate thar mi 2,027 an awm.

Mizoramah kum tin mai zirlai ṭhahnem takin hlawhtlinna an chan belh zel a, a lawmawmin ram hmasawnna pawimawh tak a ni. Zirlaite'n hlawhtlinna an chan chiah hian an hmalama an kal zelna tur an ngaihtuah nghal a ngai ṭhin a, college-a an zirna an zawh hnua an kal zelna tur hi a pawimawh tawh takzet a ni.

Higher Secondary School an zawhah zirlai tam tak chuan an kalna tur an thlang fel a, techni­cal lama kal an awm a, a ṭhenin zirna danglam bik deuhte an chhunzawm. A nawl­pui chuan college-ah zirna chhun­zawmin arts, science leh commerce-te an la a, an zawh hnuah a tam ber hi chuan sorkar hnathawh an tum ber awm e.

Mizorama thil buaithlak tak chu kan ngaihdanah sorkar hna hi hna ṭha ber, hna sang ber leh innghah ngamna ber anga ngaih a ni ṭhin. Hei vang hian sorkar hnathawh tinzawnin lehkha kan zir tlangpui. Zirlai thiam bikte chuan hna an hmu thei zel a; nimahsela zirlai naran (avarege student) tan sorkar hna, a hniam lam deuh pawh beisei theih a ni tawh lo.

Kan zir zawha kan tinzawn ber sorkar hna a awm tawh lo chunga zirna kawng tluang pangngai zawha kan la kal

ṭhup ṭhup mai hi kawng lehlama chhut chuan a mananthlak a, lehkha zir sang tak, hna hmu si lo an chhuah belh zel ang tih hlauhawm tak a ni. Kum khatah pawh MZU-in graduate thar mi 2,000 chuang a nei a, university dangah Mizo ṭhahnem tak an zir chhuak bawk ang a, kan ram hian 'lehkhathiam hna hmu lo' tia sawi ṭhin kan neih belh zel ringawt ang tih a hlauhawm hle.

Kan ram dinhmun hre reng hian graduate tharte pawhin an hmalam thlir thiam se, "Eng kawng hi nge zawh ila ṭha ber ang?" tih rilru pu chungin hmalam thlir se, zirna sang chhunzawm zel ringawt a finthlak ber lo thei a, an hmalama eizawnna tur thlir chunga thutlukna an siam thiam a pawimawh hle ang.