Mizote'n SSC kan bawh a ngai

Chief Minister chuan September 19, 2025 khan Trophy Inter School Challenge lawmman a semnaah, "A thiam tan chuan hna a váng lutuk lo. State sorkar hi chuan hna lak tur a ngah lo a, central sorkar chuan a ngah hle. Tribal qouta kan hnawhkhat zo thei lo zawk," a ti.

CM-in a sawi ang hian Mizoram bikah chuan sorkar hna thawk tur lak a tam lo a, a awm chhunahte pawh ṭhalai, lehkhathiam tak tak tan pawh hmuh a harsa. Hetih lai hian, sorkar laipuiin kum tin hna tam tham tak a la ṭhin a, chungte chu Mizorama Mizo ṭhalai tam zawk hian an ngaihven tâwk lo niin a lang.

Union Public Service Commission (UPSC) kan sawi nasa a, mipui pawhin kan hre viau. UPSC kan sawi nasat viau lai hian Staff Selection Commission (SSC) lam hi kan sawi tam tâwk lo.

UPSC aia hniam deuh ngaih SSC hi kan sawi tam a ṭul a, SSC-in exam a buatsaihte hmachhawn tura Mizoram ṭhalaite infuih nasat lehzual a ngai. SSC-in hna a lakte hi hna ṭha tak tak vek tho a ni a, kai san zel phei chuan sang tak thlen theih a ni; Mizo ṭhalaite'n SSC kan bawh nasat a ngai.

Manipur-a kan Zo hnahthlakpuite hi SSC-in hna a lak hrang hrangah an lut nasa a, India rama district zingah Churachandpur district hi SSC kaltlanga sorkar laipui hnuaia thawk tura lut tamna ber district-a sawite pawh a awm. Sorkar laipuia secretariat hrang hrangah an awm fur a, Mizoram tan ngei pawh an chhawrnahawm hle.

Sorkar laipui hnuaia hna ṭha tak tak thawk tur hian Mizoram chhuahsan hreh loh a ngai a, Mizoram chhuahsan i hreh lo ang u. Mizoram hi nuam kan ti viau a nih pawhin, India ram hmun dangte pawh a hrehawm lem bik lo tih hriat a ṭha.

UPSC-ah tlin a harsatzia kan hria a, Mizo ṭhalai, a thiam ber berte pawh an tling hlei thei lo. UPSC aia tlin awlsam zawk tura ngaih SSC hi Mizo ṭhalaite'n bei sup sup se, bei an tam nâk nâk chuan tling pawh an awm chho nual ngei ang.

Mizoramah SSC chungchang kan sawi tam a, kan inhrilh tam a ṭul a, Mizo ṭhalaite pawhin SSC lam kan hawi a ngai e.