Thuneihna lek dâwna fimkhur

Social media a chak em em a, thil thleng lian tham leh tenau deuhte kan hmu zung zung tawh. Social media-a kan hmuh leh hriatte hi thil ṭha leh ṭha lo lama hmalaknaah intihhmuhna a siam nia ngaih theih a ni.

Mizoramah hmân aṭang tawhin pawi khawihna vawi tam tak a thleng tawh a, tun hnaiah pawh a thleng ṭhin. Khawvel changkâng zelah Mizote pawh kan changkâng ve zel a, kan rilru sûkthlêng pawhin hma a sawn zel; kan hmasawnna hian kan la changkân loh zawk laia kan rilru puthmang aia ṭha lo zawk min neihtir em ni aw tia ngaihtuah theih tak a ni.

Tun hnaiah pawi khawihtu (pawi khawihtua puh) awmna khawtlang hruaitute'n pawi khawihtua puh chu an veng chhung rap tawh lo tur leh chhuak tura an tih thu hriat tur a awm nual; hetiang hi tun hnai tê-ah kan uar thar leh deuh niin a lang. Pawi khawihtua puh mai ni lo, an chhungte thlenga hmer tel a, pawi khawih ve lo thlenga tawrhtir a, an laka thurum thawhna leh veng aṭanga hnawhchhuah thu hriat tur a awm.

Hengte hi a ṭhatna a awm thei a, a ṭhat lohna pawh a awm thei a, thil ṭul tak a ni lo thei. Dan aṭanga thlir phei chuan pawi khawihtu chunga dan loa chêtna, pawi khawihna tho a ni thei a ni.

Hetianga hma kan lak ṭhin chhan hi intihhmuh thil a ni thei a, dan ngaihtuah lêm loa thuneihna inpek chawpna leh thuneihna lek châkna vang a ni thei a, social media-a kan hmuh leh hriatte'n a nghawng chhuah pawh a ni thei bawk.

Mihring hian kan phak tâwk ṭheuhah thuneihna neih kan châk ṭhin a, kan thuneihna leh thuneina nei nia kan inhriatna chu kan theihna lai laiah lekkawh kan châk a, kan tum ṭhin; fimkhur a ngai tak zet. Mi chunga thuneihna kan lek dawn hian fimkhur leh uluk taka ngaihtuah a ṭha a, rilru fîm put a ngai. Miin an lo tih tawh avangin thiam inchantir mai lo ila a ṭha hle ang.

Khawtlang tan thil ṭha ti nia kan kan inngaih lai leh, mipui pawhin thiam min chantir nia kan inhriat lai hian, dan kalhin thil ti kan lo ti reng thei a, Pathian mithmuhah thil sual kan lo ti ve reng thei tih kan hriat a ngai a ni.