NH kawngpui siam vil ṭhat

Chief Minister leh sorkara hotu ṭhenkhatte'n September 23, 2025 khan National Highways & Infrastructure Development Corporation Limited (NHIDCL) hotute an ṭhutkhawmpui a, Mizorama national highway an siamte leh hnathawh dante an thlir.

Ṭhutkhawmah hian CM chuan NHIDCL leh an hnuaia contractor-te'n Mizorama NH an siam zawh tawhah chhe leh tawh, thawm ṭhat ngai a tam leh tawh a, chungte chu contractor liability period chhunga mi vek a nih angin rang taka thawm ṭha turin NHIDCL hotute a hrilh.

NHIDCL hi Mizorama national highway enkawltu an ni a, an hnuaiah contractor (company) hrang hrangin kawngpuite zauhin, an siam. Kawngpui eng emaw zat chu siam zawh tawh a ni a, siam mek leh la siam loh hrim hrim a awm nual bawk.

CM leh kawngpui siam chungchanga state sorkara mawhphurtute'n NHIDCL hnathawh an thlirpui hi a ṭha a, ram leh mipui tan rah ṭha a chhuah ngei beisei ila. CM-in ngai pawimawh bik ṭul lai te, kawng siam zawh tawh, kum khat êrh âwrh hnua chhe leh ta mai thawm ṭha thuai tura a hrilh hi NHIDCL leh an hnuaia contractor-te'n rang takin bawhzui rawh se.

Hetih lai hian, kawng siamtute pawhin harsatna eng eng emaw an nei ngei ang tih a rinawm a; an harsatnate chu anmahni ringawta chinfel harsate pawh a awm ang. Harsatna an neihte state sorkar hotute hnenah an thlen ṭhin a ṭul àwm e. State sorkar hotute pawhin kawng siamtute'n harsatna an tawhte chingfel tura ṭan an lakpui vat a ṭha.

Kawng siamtu contractor-te'n kawng an siamte chu hmun ṭhenkhatah chuan an siam ṭha tâwk loa ngaih theih turte pawh a awm. An siam dan a ṭhat tâwk loh vanga kum khat emaw chhung leka chhe leh tate pawh a ni thei a ni.

Mizoram chhung a nih angin state sorkara thuneitute leh a chhehvela mite'n a theih ang anga vilpui a ṭha khawp mai. NH kawng siamte hi a awmna district-a thuneitute'n uluk zawkin vil se, zing zawkin endik ṭhin se, kawng siamtute inthlahdah tur a véng ang a, kawng siamin a ṭhat phah ngeiin a rinawm.

Kawng awmna khawtlang pawhin tlawmngaiin lo enfiah ve ṭhin se, kawng siam danah ṭha tâwk lo a awm nia hriatte chu thuneitute hnenah thlen ṭhin se, awmzia a neih ngei a rinawm a ni.