MSPMC hmalakna ngaih pawimawh ni se

26th September, 2025

Mizoram sorkar chuan Mizorama hmasawnna hnathawhte chak zawk leh dik taka thawh a nih theih nan endiktu tur Mizoram State Project Monitoring Committee (MSPMC) a din a; MSPMC Annual Report 2024-25 chu September 24, 2025 khan Chief Minister-in a tlangzarh.

Report tlangzarhnaah hian CM-in MSPMC member-te chu a fuih a, "Tu mah hlau lo u la, ruling mi leh sa nih chhuang an lo awm a nih pawhin hlau suh u, in lamah kan ṭang zel ang," a ti.

Sorkar hnuaia Mizorama hmasawnna hnathawhte a ṭhat theihna tura viltu leh endiktu MSPMC din a ni hi a ṭha em em. Endiktu din hrim hrim ringawt erawh lawmna tur a ni lo a; lawmna tur innghahna pawimawh tak chu–hma an lak dan leh an hnathawh danah a ni.

MSPMC-in kum khat chhunga hna 47 lai an endik hman hi a lawmawm; theihtawp chhuahin hma an la niin a hriat. Ram leh hnam tan thil ṭha leh ṭangkai tak an ti thei a ni tih rilru pu chungin ṭang mar zel se.

CM-in MSPMC member-te a fuih a, hma an laknaah tu mah hlau lo tur leh, ruling mi leh sate pawh hlau lo tura a chah hi a lawmawm. MSPMC member-te'n CM fuihna thu hi hre reng se; CM fuihna hian CM leh minister-te pawh a huam vek a, anni pawh hi a ṭul a nih phawt chuan thil ṭha turah chuan huaisen takin nawr ngam se.

Sorkar hnuaia contract hna thawktu leh enkawltu zingah party mi an awm fo, a bik takin sorkar lai party mi leh sa te; tun sorkarah pawh an awm ngeiin a rinawm. CM-in a fuih angin party mite lakah hna endiktute'n huaisen takin hma la zel se, dâwngdah taka hna thawktute chu na takin zilh ngam zel se, hna ṭha lote chu thuneitute hnenah thlen zat zat a ṭha.

MSPMC hmalaknate ramin a ṭhat phahna tur chuan an rawtnate sorkarin a ngaih pawimawh a ngai. An hmalakna leh rawtnate sorkarin a ngaih pawimawh loh a, tihhlawhtlin a tum leh si loh chuan awmzia a nei dawn lo. CM hian MSPMC a fuihna hi mipui hriata lan mawina atan ni mai loin, a tak taka a thlâwp a ngai a ni.

Hmasawnna hna thawktute pawhin endiktute an ngaih pawimawh a ngai bawk a; zilh an lo tâwk a nih pawhin, insiamṭhat nan an hman a ṭha hle ang.