Sairang-Aizawl inkara lirthei tlântir

Sairang aṭangin khawpui lian pathum–Delhi, Kolkata leh Guwahati-ahte khualzin phur rel a tlan ṭan tawh a, tlan hun tur bitukah tluang takin a tlan meka hriat a ni. Bungraw phur rel (wagon train) pawh a tlan ṭan tawh a, wagon train erawh hi chuan tlan hun bik duan sa nei loin, bungraw phurh tur awm dan azirin an tlan ṭhin.

Sairang thlenga khualzin phur leh bungraw phur rél a lo luh tâk avang hian Mizoram mipui nawlpui kan lâwm tlang niin a hriat; a lawmawm bawk a ni. Kawng tam takah Mizoramin hma a sawn phah ngei a rinâwm.

Rêl rawn lut vang hian Mizoramah hnam dang lutchhuak an tam phah hle dawn tih a chiang a, chuvang chuan sorkar pawhin nasa takin hma an la mek. ILP chungchangah Home department-in chak takin hma an la a, khualzinte'n awlsam zawk leh man tlâwm zawka Aizawl an thlen theih nan Transport department-in September 29, 2025 aṭangin MST bus an tlantir dawn bawk. Hetianga sorkarin hma a la hi a lawmawm.

Lengpui Airport aṭanga Aizawl panna tur lirthei chungchangah harsatna neuh neuh a awm tawh ṭhin. Harsatna ṭhenkhat chu Airport bula innghat taxi-te vang a ni a, thlawhnaa rawn lut ṭhenkhat chu mi dangin an phurh an phal lo ṭhin; huamhauh vang a ni ngei ang.

Sairang rêl chawlhhmunah hi chuan Aizawl panna tur lirthei chungchangah pawl anga indin a, inthuruala khualzinte an phurh tura hauh tlat a, mi dang phurh ve phal loh ang chi hi awm lo se a duhawm hle.

Aizawlpan tur khualzinte maxicab emaw, taxi emaw ten an phurh a ngai a, an phur ngei bawk ang. Chutih rualin, huamhauh leh duhâm vangin mi dangin an phurh ve phal loh tlat ang chi hi khualzinte tana harsatna siamna a ni a, awm lo se a ṭha, chutiang thil awm thei chu tun aṭanga vên lâwk a ngâi. Kalphung mumal a awm a ngai a, lirthei neitu pawlte'n an duh duha thil an tih mai loh nan thuneitute'n ruahmanna mumal leh ṭha an siam a ngai a ni.

Rêl hmanga Mizorama rawn lut, Sairang rawn thlengte'n awlsam zawk leh tláwm zawka Aizawl an thlen theihna tura Transport department-in MST bus an tlantir tur hi a lawmawm tak zet a, mi tam tak tan harsatna a pumpelhtir ngei ang. Khualzin an tam tial tial a ni thei a, Transport department hian khualzin tam dan azirin bus tam zawk tlantir thei se a duhawm.