Kawngpui kam humhalh Urban Development & Poverty

Alleviation (UDPA) depart­ment huaihawtin tun hnai khan Bawngkawn leh Phun­chawng inkar kawngpui dung thenfai hnatlang thawh a ni. 

He kawngpui pawimawh tak mai hi Mizoram pawna khualzinten an paltlang ṭhin a, a bikin Lengpui Airport kal tlanga Mizorama lo lutte'n an hmun hmuh hmasak ber zinga mi a ni ṭhin. Zep thu a cheng lo a, he mi kawng chhehvelah hian zu zuar leh zu rui an tam ṭhin avangin kawngpui kamte pawh a ṭawp hle mai a, zu inna hnuhma then fai loh tam tak a awm a, zu ûm leh zu funna ruak paih darh hmuh tur a tam hle. 

He kawngpui pawimawh leh langsar tak maia bawlhhlawh thenfai hnatlang UDPA depart­ment lamin an thawk hi a lawmawm a, hei hi vawi khata chinfel duak theih a ni dâwn lo a, a khat tawkin awmze neia thenfai ṭhin a ṭha hle ang. A tibawlhhlawhtu lam an tamin nitin mai kawng kam hi an tibal chu a ni deuh ber a, hei vang hian regular taka thenfai hna thawktu inruat a ṭul awm e. 

Aizawl khawpui daifema kawngpuite hi enkawltu nei lo ang maiin bawlhhlawh paihna hnuhma leh bawlhhlawh a awm ṭhin a, a zialo hle. World Bank Road an tih mai Falkland Veng leh Melthum inkar kawngpui kamte hi zan lamah bawlhhlawh paih rukna atan an hmang ṭhin a, Falkland leh Ramthar North inkara kawngpui laih thar kamte hi a ṭawp em em tawh a, hun rei tak chu Durtlang Leitan panna, Lily Veng leh Ṭhuampui kawngpui kamte pawh ualau taka leivung leh bawlh­hlawh paih rukna a ni ṭhin. 

Kawngpui kama bawlhhlawh leh leivung paih vengtu hi a hranpaa dah theih ni se an ṭangkai hle ang tih a rin theih a; zan rei lama kan khawpui daifem kawng kam remchanga bawlhhlawh leh leivung paih rukte leh, chhun lama kawngpui kama bawlhhlawh paihte hi thui tak ven theih dan a awm ngei ang.