Ropeway leh skywalk chhuina

Sakawrhmuituai Tlanga skywalk siam leh Chaltlang leh Durtlang inkara ropeway siamnaah sum tam tak tihchingpen a awm nia sawi chu Anti Corruption Bureau (ACB)-in an chhui mek. ACB hian skywalk leh ropeway siam hna thawktu JV NEIP, Delhi hotu pakhat an man tawh.

Ropeway leh skywalk chungchang hi ACB chuan hun eng emaw chen an chhui tawh a, mahse, an la chhui zo dawn hnai loa sawi a ni. Chhui harsa leh buaithlak tak a ni thei a; mipui ngaihven berte zinga mi a nih avangin ACB hian chonaah ngaiin, theihtawp chhuahin chhui zel rawh se.

Tourism department tarlan dan chuan, ropeway leh skywalk siamna atan hian March 27, 2017-ah cheng nuai 1,981, September 29, 2017-ah nuai 2,482.16 leh September 17, 2018-ah nuai 489.94 pek chhuah a ni a; a vaiin cheng nuai 4,953.10 a tling.

Hna thawk turin adventure components atan JV NEIP leh civil construction work atan Lushai Engineers rawih an ni a; contractor-te'n bil an thehluh aṭanga a lan danin, contractor-te'n ropeway atan cheng nuai 1,317.80 leh skywalk atan nuai 302.89 an dawng. Sum pek chhuah tawh erawh nuai 4,953.10 a ni.

Ropeway leh skywalk siamnaah hian cheng vaibelchhe tam tak a chingpen ngei niin a lang a, Mizoram mipui pawhin an ngaihven hle. Bul ṭan chhoh lai leh hna thawh ṭan tawh laia sorkarna chelhtu party-te an inpuh tawn a, Tourism department enkawltu minister-te chu fihlimah an inngai ve ve niin a lang bawk.

Sorkar sum, mipui sum tam tak sên a nih tawh laia zûzî ta ropeway leh skywalk siamnaah hian sum tam tak tihchingpen a awm ngei tih a chiang a; sorkar sum tichingpentu, dik lo taka sum eirutute chhui chhuah ngei ngei a ngai.

Sum tihchingpen chhuitu ACB-in kum hnih chuang fé an chhui tawh niin a lang a; theihtawp an chhuah ngei a rinawm a, chuti chung chuan, ṭan an lak lehzual a ngai a ni. Ropeway leh skywalk hi ACB-in chak lehzualin chhui se, Lokayukta pawhin theihtawp chhuah rawh se.

Cheng vaibelchhe têl tihchingpen nia lang hi an chhui chhuak thei lo emaw, thil dik lo ti an hmuchhuak lo emaw a nih chuan a chhuitute tan mualphona a ni dawn; an chhui chhuak a nih erawh chuan hmingṭhatna a ni thung ang.