Sairang - Aizawl khualzin phur lirthei

Sairangah khualzin phur rel a thlen tak avangin Transport department chuan an lo ruahman lawk tawh angin nimin aṭang khan Aizawl leh Sairang inkarah bus a tlantir ṭan. Hei hi Aizawl aṭanga Sairang pan turte leh Sairanga aṭanga Aizawl pan turte remchan zawkna atana tih a ni a, a lawmawm a, khualzinte'n an hman ṭangkai ngei a beiseiawm.

Phai lam aṭanga rêl hmanga Sairang rawn thlengte Aizawla phur turin inchuhna a awm mek niin a lang. Khualzin rawn thlengte chuanna atan Aizawl city bus lamin Aizawl leh Sairang inkarah city bus tlântir tumin hma an laa sawi a ni a, chutih laiin, Sairang lam chuan city bus tlantir an duh loa sawi a ni.

Khualzin thlen khawmna hmuna khualzin phur tura hauh tlat leh mi dang phurh phal ve loh hi Mizoramah thil thar a ni lo. Lengpui Airport-ah khualzin rawn thleng zinga lirtheia lo hmuaktu nei lote chu Lengpui taxi-te'n an hauh na hle a, mi dangin an phurh ve an remti lo ṭhin; inhmuh thiam lohna neuh neuh a thlen phah tawh ṭhin.

Aizawl city bus-te hi a hming aṭang chuan Aizawl khawpui chhung (municipal area)-a tlân tur ni âwm tak a ni. Chutih laiin, AMC area pâwn ZMCH, Falkawn lamah eng emaw zat tlantir a ni tawh. Hei hi mipui tan remchanna a nih a rinawm a, chutih rualin, sumdawnna lirthei dang tan harsatna thlentu a ni thei.

Sairang pawh Aizawl khawpui páwn lama awm a ni. City bus-te'n Aizawl leh Sairang inkarah tlân tumin hma an la nia sawi hi thil àwm lo a nihna lai a awm. Chutih rualin, taxi hman man a to em em a, rêla chuan man aiin Sairang-Aizawl inkara taxi hman man a tam zawk mah; hei hi khualzin tam tak tan a thanatthlak viau thei. Hei vang hian city bus tlantir pawh a ṭhatna lai a awm ang.

Rêl hmanga Sairanga khualzin rawn lutte'n Aizawl pan turin lirthei an mamawh zel dawn; an rawn lut tam zel ang a, lirthei mamawhna pawh a sang zel ang. Rêl hmanga khualzin rawn lutte remchanna leh ṭhatna tur ngaihtuah a ngai.

Huamhauh lutuk vanga khualzinte hauh tlat, mi dang phurh ve phal loh ang chi hi thil ṭha a ni lo, mahni hmasialna a ni. Sairanga khualzin rawn lut, Aizawla kal turte hman tur lirthei chungchangah hian plying permit petu Transport department-in khualzinte leh commercial vehicle chi hrang hrangte dinhmun thlir chungin, fimkhur taka ngaihtuahin, huaisen takin hma la rawh se.