Permit pek chhuah belh lo zel se

Transport Minister chuan tun hnaia press mite hnenah, sorkarna an chelh hnuah Aizawl khawpui atan taxi (four wheeler leh two wheeler) permit an la pek chhuah loh thu leh an pe chhuah dawn rih loh thu a sawi.

Transport Minister hian an party mite zingah eizawnna atana taxi permit duh ve awm mah se, pek an tum rih loh thu a sawi a; Aizawl khawpuiah taxi a tam thu leh dinna hmun pawh an inchan meuh loh thu a sawi bawk.

Aizawlah city bus leh taxi-te intlân chhâwk a ngai hi Aizawlah mamawh aia tam a awm tih tichiangtu-ah a ngaih theih. City bus leh taxi te intlân chhâwk hi mimal lirthei intlan chhâwk kalpui hma daiha tih ṭan tawh a ni a; an intlân chhâwk an tih chhan hi Aizawl traffic tâwt lutuk vang ni loin, an indaih lutuk vang nia sawi a ni.

Aizawl city bus-te hi an indaih em avangin plying permit pek laia an tlânna tura ni loa ngaih theih Aizawl khawpui páwn lam thlengin tlânna tur an zawng chho zel niin a lang. Hei vang hian Aizawl khawpui hian city bus petmit pek chhuah belh a mamawh lo tih a chiang a, sorkarin a pek chhuah belh lo zel rawh se.

Four wheeler taxi pawh Aizawlah khawpuiin a mamawh aia tam a awm. Hun rei tak chhung chu sorkar chawlh ní tih lohah chuan ni tin hmun thuma ṭhena hmun khat an ding ṭhin a, tun hnaiah hmun ngaa ṭhena hmun khat an ding ta thung.

Two wheeler taxi pawh Aizawlah tlântir a nih aṭanga kum rei lo tê-ah intlân chhâwktir nghal a ni a, ni tin hmun ngaa ṭhena hmun khat an ding ṭhin. Hei pawh hi an tam lutuk vangah a ngaih theih.

Hun hmasa lamah sorkarin an duhsak zawngte leh party mite tihlawm nan commercial vehicle permit an pe nasaa sawi a ni a, khawpuiin a mamawh tawk aia tam bus leh taxi a awm phah a; a zialo hle.

Tuna sorkar laiin kum 2 dáwn hun an hman tawh chhunga permit an la pe chhuak lo hi a lawmawm. Tun dinhmunah chuan Aizawl khawpui hian city bus leh taxi chi hnihte hi a mamawh belh lo a, sorkar hian hun eng emaw chen chu city bus leh taxi permit a pek chhuah belh loh zui zel a ngai a ni.