Rêl kawngah fimkhur a ngai

Kolkata - Sairang Express rêl, Sairang pan mekin September 28, 2025 zan khan Mualkhang station leh Kawnpui station inkarah mi pakhat a chil hlum hlauh mai.

Aizawl (Sairang)-a khualzin phur rêl a tlan (service) ṭan aṭanga chawlhkar hnihnaah chiah vanduaithlak taka rêlin mi a chîl hlum palh hlauh mai hi a vanduaithlak a, a pawi hle. Mizoramah rêlin mi a chîl hlum hmasak ber niin a lang.

Sairang thlengin rêl a tlân tawh avangin Northeast Frontier Railway chuan Kolasib district leh Aizawl district-a rêl kawng hnaih khaw hrang hrangah rêl kawnga himna chungchang zirtirna - Railway Safety Awareness sikulahte leh mipui vantlangah an lo buatsaih tawh.

Railways lam hian rêl kawng hnaih khuateah inzirtirna an buatsaih bakah, fimkhur tura Mizoram mipui ngenna an tichhuak tawh ṭhin a, media-ahte pawh a chhuak tawh ṭhin. Himna chungchangah an theih ang angin mipui vantlangah zirtirna an nei niin a hriat a, a lawmawm. Chutih rualin, duhtâwk mai loin, ti chhunzawm zel se a ṭha ang.

Rêl kawng leh a chhehvelah fimkhur a ṭulzia te, mihring tana a hlauhawm theih dante inzirtirnate hi Railways lamin ti chhunzawm zel se la; mipui pawhin a hlauhawm a ni tih hi kan pawm a, kan fimkhur hle reng a ngai.

Rêl kawng hnaih khuaa mipuite hi hmun danga mite ai chuan rêl kawng hnaiah an kal tam nge nge ang tih a rin theih. Chuvangin, rêl kawng hnaih khuaa khawtlang hruaitute'n an khua ṭheuhah rêl kawng leh a bul hnaiah fimkhur a ṭulzia leh, tih leh tih loh tur te, awm dan turte khaw mipuite hnenah an zirtir reng a ṭul.

Chhiatna a thlen tawh chuan tih theih dang a awm tawh lo a, mihring nunna hial kan chân tawh. Rêl kawngah chhiatna a thlen tawh loh nan Mizoram mipui kan lo inbuatsaih ve a ngai a, kan lo inbuatsaih ve theih dan awm chhun chu mipui hriatah fimkhurna tur hrang hrangte leh invenna turte a tam thei ang inzirtir a ni.

Railways leh rêl kawng hnaiha khuate'n rêl kawnga himna chungchang a tam thei ang ber an puanzar zel a ṭul. Mizoram mipuite rêl kawngah i fimkhur zel ang u.