Thisen pekah chawimawina

October 1 kha India ramah thisen pek ní, National Voluntary Blood Donation Day a ni. Mizoram hmun ṭhenkhatah hman niin, thisen pek (blood donation camp) huaihawt a ni a; Mizo hmeichhia, thisen pe ṭhate chawimawi an ni bawk.

National Voluntary Blood Donation Day hi sorkar laipuia Directorate General of Health Services chuan AIIMS, New Delhi-ah an hmang a; Mizoram hnenah chawimawina Blood Donation Award hlan a ni. Mizoramin chawimawina a dawn chhan chu - a thlawna thisen pekah India hmarchhak biala a tih ṭhat ber vang a ni.

Kum liam ta 2024-25 chhung khan Mizorama thisen pek zawng zawng aṭanga 93.71% chu pek bik nei loa a thlawna pek a ni. Mizorama voluntary donation rate hi hmarchhak bialah a sang ber a nih bakah, India ram pum huap pawhin a sang ber pawl a nia sawi a ni a; a lawmawm tak zet.

A thlawna thisen pekah Mizoram dinhmun a sàn theih chhan hi Mizoram mipui, a bikin ṭhalai te, NSS te, kohhran ṭhalai pawl te, YMA-te leh pawl hrang hrangte vang a ni a; a lawmawm a, an fakawm hle. Mizoram ṭhalaite hi India rama Mizoram tihmingṭhatute an ni.

MSACS hotute sawi danin, India ram pum huapin hmeichhiate thisen pek zat chu pek zawng zawng aṭangin 4% chauh a ni a, Mizoramah erawh chuan thisen pek zawng zawng zinga 30% lai chu hmeichhiate pek a ni thung. National average hian Mizoram average a phak lo nasa hle.

Thisen pekah na nâ nâ chuan Mizo hmeichhiate hi India rama hmeichhiate zingah an chhuanawm ber a tih ngam a, fak an phu tak zet. Kumina Voluntary Blood Donation Day hmannaah pawh Mizo hmeichhia thisen vawi 20 pe chin chawimawina hlan tur mi ṭhahnem tak an awm hial. Thisen peka tuna an dinhmun chhuanawm tak hi duhtawk mai loin, thisen pek uar zel se a duhawm.

Thisen hi khawvel thiamnain tun thlengin a la siam chhuak thei lo a, chuvangin, thilpek rau rauah a hlu bik hle; mi nunna chhan himna a ni. Thisen pe tawh ṭhinte'n pe zel ila, zing zawka pek tum ila, la pe ngai lote pawhin pek ngei i tum ang u. Thisen pe thei turin hriselna vawn uluk a ngai tih hriat reng a ṭul bawk.