Faina nunpui a hun tak zet

Kumin September 17 aṭanga October 2 chhung khan Mizoramah faina beihpui thlâkna, Swachhata Hi Seva campaign neih a ni. He chawlhkar hnih chhung hian hmun eng emaw zatah faina hnatlang neih a ni a, faina lam hawi intihsiakna chi hrang hrang buatsaih a ni bawk.

Kum eng emaw zat kal ta aṭangin kum tin Mizoramah faina hapta

kalpui a ni a, faina inzirtirna leh hna-tlang buatsaih a ni ṭhin. AMC lamin theihtawp chhuahin faina lamah hma an la bawk a, sum pawh tam tak an sêng tawh.

Tunlaiin Aizawlah fainaa YMA branch-te inelna neih mek a ni a, endiktute'n veng hrang hrang an endik mek. UDPA department bultumin khawpui fai intihsiakna kalpui ṭhin a ni bawk a, kumin tawp lamah district khawpuite leh census town-te endik a ni dawn.

Mizoramah hian faina chungchang inzirtirna a tam tawh viau a, hma pawh kan sawn ve zel a, kan fai tial tial. Mahse, kan dinhmun dik tak chu - kan la fai lo hle tih hi a ni.

Aizawl pawn lam khawpui ṭhenkhat an fai viau tawh a, bawlhhlawh ṭawih thei leh ṭawih thei lo pawh an thliar ṭha viau. Kan khawpui ber Aizawl hi a la fai lo. Veng tlem azawng chu an fai viau a, veng tam ber erawh an la fai lo hle.

Aizawlah hian khawlai leh kawngpui kamah thil eina káwr leh plastic tui ûm (bottle) hmuh tur a la tam em em a, meizial bung a tam hle a, kuhva eina chil chhâk sen leh chinai tahna sûlhnu hmuh tur a tam. Luikawrah sarâng leh plastic ûm ṭawih thei lo a tam hle bawk.

Kum tam tak chhung faina chungchanga inzirtirna nasa taka buatsaih a ni tawh chunga kan khawpui ber a la fai hlei thei lo hi a manganthlak lek lek tawh. Faina chungchangah hian mipui kan harh a hun tak zet a, faina a tak taka kan nunpui a ngai a, kan thinlungah kan vawn tlat a, thisena kan ṭhan hnan a ngai; mipuiin ṭan kan lak a ṭul.

Chhung tin leh mi tin hian bawlhhlawh kan nei vek a, kan bawlhhlawhte fimkhur tak leh a nih dan tur dik taka kan thehthang a hun tak zet tawh. Bawlhhlawh paih leh thehthang danah kan fimkhur loh hi kan tuar let ṭhin a ni tih hi kan pawm a ngai a; fai turin keimahni mi tin hi kan inenfiah a ngai a ni.