GST vanga thil man tihniam

India sorkarin thil/bungrua tam takah Goods & Services Tax (GST) rate a tihniam a, chu chu September 22, 2025 khan ram pumah hman ṭan a ni.

Mizoram sorkara Taxation hotute sawi danin, GST rate thar hman ṭan aṭangin GST rate tihhniamna bungraw man sumdawngte'n an tihhniam leh tihniam loh endik ṭhin a ni a; thil man tihniam lote chu pawisa an chawitir ṭhin. Man chhuah vawi khatnaah Rs 10,000 vel chawitir an ni a, man nawn leh an nih chuan pawisa chawi zat a pung zel dawn.

GST tihhniam a ni hi a lawmawm tak zet a, mipui hamṭhat tur a ni. A lawmawm viau rualin, GST tihniamna bungruaah sumdawngte'n a man an tihhniam ṭhat duh loh erawh chuan a thinrimthlak dawn thung. Chuvangin, sumdawng zawng zawngte'n GST rate tihniamna bungruaah chuan GST milin a man an tihniam ngei tur a ni.

Bungraw ṭhenkhat siam chhuaktu company leh dealer ṭhenkhat chuan GST rate tihhniam a nih vanga an bungrua (thil zawrh) man hniam dan tur media-ah an tichhuak ṭhin. Mizoramah pawh, a bik takin lirthei company leh dealer-te'n GST rate hniam hnua lirthei man a tlawm zawkna turte chanchinbuah an tarlang chuai chuai a; a lawmawm.

Hetih lai hian, mipui nâwlpui nghawng, ni tin mamawh ei leh in tur lamah erawh chuan Mizoramah thil man a la hniam phah lêm loa sawi a ni. GST rate hniam vanga sumdawngte'n thil man an tihhniam leh tihhniam loh hi thuneitute'n khauh lehzuala an enfiah a ṭul a, chak takin bawhzui se, dan ang takin hremna pawh lek rawh se.

Taxation hotute chuan GST rate thar anga thil man tihhniam tur tihniam lote chu phone number 0389-2336167, 8415065109 leh 9862581640-ah te, Taxation pisa hrang hrangahte hriattir turin mipui an ngen. Taxation lamin an ngen angin, GST hniamna bungraw man tihniam lo hriate chuan Taxation-ah hriattir zel ni se; Taxation pawhin complaint an dawnte chak taka an bawhzui a ṭul.

GST rate tihhniamna a nih avang hian Mizoramin GST aṭanga chhiah a hmuh zat a tlakhniam ngei rin a ni. GST hi Mizoram sorkar sum hmuhna lian ber a ni a, GST a tlakhniam chuan Mizoram sorkar sum hmuh a tlahniam dawn tihna a ni. GST aṭanga chhiah hmuh a tlahniam a nih pawhin, state sorkarin a tawrh lutuk loh nan thuneitute'n tun aṭangin ngaihtuah an sên a ngai ang.