Leivûng paih dan vil uluk ni se
PHE department enkawltu Minister-in October 3, 2025 khan Aizawl tlâk lama khawpui hêlna tur Aizawl Western Bypass Road (Muallungthu-Sihhmui) laih mek a tlawh a; kawng laihna vûngte a paihna tura siam (spoil bank)-ah chauh paih turin hna thawktute a hrilh. Kawng laih mek hi Tlawng lui chhaka kal a ni.
Tlâk lama Aizawl hêlna tur kawng sial mekah hian leivungte kawng thlangah an paih nasat avangin NGO pakhat chuan sorkara thuneitute hnenah an thlen tawh a; thuneitute pawhin kawng thlangah leivûng paih tawh lo turin an hriattir tawha sawi a ni.
Kawng sialna leivûngte kawng thlangah nawr liam lo tur leh spoil bank-ah chauh paih tura department leh Minister-in an hriattir hi a lawmawm. Heng thupek leh hriattirna te hi kawng laitute'n an zawm leh zawm loh uluk taka vil zui a ṭul.
Hun kal tawhah Mizorama national highway-te hmun hrang hrangah zauh a ni a, kawng thlangah leivûng paih phal a ni lo chungin an nawr liam nasa a, chu chuan harsatna a thlen tawh ṭhin. Mi tam takin sawiselin an dodâl a, mahse, an zâwm ṭha lo viau tho.
Kawng sialtute dan anga an che duh lo leh sorkar thupek an zâwm ṭha duh lo ṭhin hi a thinrimthlak a; sorkar ang leh Mizoram pum ang pawhin a tlàwmthlak.
Kawng siamna atana sum ruahmanah leivûng paihna tur siama an paihna senso tur dah tel a ni ṭhin. Spoil bank-a paih lo a, kawng thlanga an nawr liam mai hian leivûng paihna tura sum chu kawng siamtute'n an hlêp thei dawn tihna a ni; an hlâwk hle ang. Kawng laitute'n thupek an zâwm ṭha duh lo ṭhin hi leivûng paihna tur sum an hlêp tur chu sorkara thuneitute nen chang tlang turin an insiam rem a nih a rinawm rum rum thei hial.
Aizawl Western Bypass Road hi Aizawl mipui châwmtu Tlawng lui chhak lawka kal a nih avangin kawng thlangah leivûng paih loh a pawimawh zual. Kawng thlangah leivûng paih a nih loh nan hriattirna tihchhuahte khawng taka kenkawh ni rawh se.
Kawngpui laih a nih hian kawng thlang lamah leivûng tla tâwk a awm lo thei lo a, hei hi chu hriatthiam theih a ni; kawng thlanga leivûng nawr liam luih erawh hriatthiam theih a ni lo.