Inthlanna thianghlim nei tura ṭan tlân

Election Commission of India chuan Dampa assembly constituency by-election neih hun tur chu October 6, 2025 khan a puang ta a, November 11, 2025-ah inthlan a ni dawn.

Dampa by-election neih turah hian candidate ni turte tan October 21, 2025 thleng hming pek luh theih a ni dawn a, October 24 thleng inhnuhdawh theih hun hawn a ni. November 11-ah vote thlak tur niin, vote tlate chu November 14, 2025-ah chhiar a ni ang.

MLA ni lai thihna avanga inthlan ṭhat a ngai hi Mizoram mipui duh ber dan a ni hauh lo ang a, mahse, vanduaithlak taka Dampa bialtu MLA kan chàn tâkah chuan inthlan ṭhat a ngai si. Inthlan thianghlim, dik leh felfai a awm theih nan thuneitu te, inthlan buaipuitu te, political party-te leh candidate te, mipuite'n theihtawp chhuah tlân a ngai dawn a ni.

Dampa bial inthlan ṭhat atan thla khat zên zâwn hun a la awm a, party te, candidate te, official lamte'n inbuatsaihna hun thla khat chuang hret an la nei tihna a ni. Rilru fím tak pu chungin, fimkhur tak leh dik taka inbuatsaihin inthlan hmachhawn ṭheuh ni se.

Inthlan puan a nih tawh avangin inkhuahkhirhna dan, Model Code of Conduct hman nghal a ni. Code of Conduct hi a hming maia puan a ni lo a, zawm ngei tur a ni tih political party leh candidate ten an hriat a, an zawm ngei a ngai.

Candidate mal insawichhiatna te, tun hma chanchin sawi chhuaha intihhmingchhiatna ang chi-ahte political party-te leh candidate tinte an insûm a ṭha a; hetiang thil hi Pathian ringtu, rawngbawltu nihnate nen pawh a inhmeh lo.

Model Code of Conduct emaw, dan leh thupek dangte emaw bawhchhia an awm a nih chuan enliam mai lo a, hrem ngai an awm a nih chuan thuneitute'n huaisen taka an hrem a ṭha ang. Thuneitute hnena party dang leh candidate dangte hêk chungchangah pawh, thil dik lo titu na nâ nâ chu thuneitute hnena thlen a ṭha a; chutih rualin, thu dik lo leh thu dik tluantling lo hmanga inhêk erawh awm lo se.

Dampa by-election neih turah hian inthlanna rálmuang leh thianghlim, dik leh felfai a awm ngei theih nan theihtawp chhuah tlân a ṭul a, dan awm zawng zawngte ṭha taka zawm a pawimawh. M tinte ṭangrualin theihtawp i chhuah tlang ang u.