Ei leh in tur thianghlim

Directorate of Health Services hnuaia Food Safety chuan tun hnaiah hriattirna a tichhuak a; Food Safety and Standards Act, 2006-in a phût angin eiin siam leh zuara sumdawnna neite'n food license (FSSAI license) an neih ngei a ngaih thu tarlan a ni.

FSSAI license neih ngai zingah hian - eichawp dawr, thingpui dawr, restaurant, cafe, hotel, guest house, homestay, hostel, caterer, chhang siam, chawhmeh zuar, sa dawr, theitui siam, kawng kama ei leh in dawr siam (street food vendor) te an tel. Food license nei loa sumdawnna kalpuite chu dan angin hrem theih an ni.

Mizote ruaiṭhehah tun hma deuh chuan 'Fatu kut ten loh tur' tih sawi a ni fo; ruai fatute'n chaw/chawhmehte kut lâwngin an ṭhâm bawrh bawrh a, chu chu ten loh tur tihna a ni ber. Hetiang hi a changkâng lo hle; khawpui leh hmun tam takah chuan an chìn tawh loh a ni a, hmun ṭhenkhat, a bikin thingtlangah erawh chuan chíng an la awm mai thei.

Mizote hi kan changkàn viau tawh lai leh, ei leh in lam kan uluk viau tawh karah hian, ei leh in siamah faina leh thianghlimna kan la ngai pawimawh tâwk lo. Restaurant leh hotel tam tak chu dawrtute thlen theih chinah a fai viau mah se, ei tur siamna hmun (choka) lam erawh a ṭawp ṭhin. Mi hmuh theih lai chauh fai vur, ei siamna hmun ṭawp leh thianghlim lo si hi a ṭha lo a, ei tur siam a thianghlim tâwk loh phah theiin a rinawm.

Ei leh in tur siamna hmunte hian faina leh thianghlimna ngaih pawimawh berah an nei tur a ni a; chokate uluk taka tifaiin, thianghlim thei ang berin an enkawl tur a ni. Hei hi an tih ngei tur, an mawhphurhna a ni a, danin a phût a ni bawk.

Ei leh in tur a thianghlim zawk theihna tura tun hnaia Food Safety-in hriattirna a tihchhuah thar leh hi a pawimawh; mipui himna tur leh hriselna nghawng thil a ni. Ei leh in tur siamtu leh zuartu zawng zawngte'n dan awm sa bakah, Food Safety hriattirna chhuah thar hi an zawm ngei a ṭul.

Ei leh in tur siamna hmunte'n dan leh thupek an zawm leh zawm loh pawh thuneitute'n an endik fo a ṭul bawk.