Mipui zirtirna tam zawk

Health department chuan thuchhuah siamin, kumin chhungin Aizawl khawpui huam chhungah veng 30 velah Dengue natna hmuh chhuah tawh a ni a, mahse, tun thlengin Dengue vanga thi an la awm lo tih an tarlang. Dengue vei awmna vengah awareness campaign, source reduction (thosi pianna tihbo) leh a kah rêm hna (space spray & fogging) an nei zui nghal zel tih an sawi a; sorkar department hrang hrang, khawtlang hruaitute leh tlawm-ngai pawlte nen theihtawpin ṭan lak tlan mek a nih thu an sawi bawk.

Hri a len hi chuan mipui zingah chi-ai tawk an awm lo thei lo a, mipuite chi-ai lo tura chanchinbu leh TV hmanga hrilh ringawt hi a tawk ṭhin lo. Hri a leng emaw, natna hluar thar deuh a awm a nih chuan thuneitu lamin mipui hnena thil awm dan dik tak rang taka an puan hi a ṭul hle a ni.

Kan dinhmun tawn mek a hlauhawmzia hre loa lo tawng-pawng thlamuan ve vak theih a ni a; chutiang bawkin thil hlauhawm lo pui hi a nihna tak hre chiang loa kan inhrilh darh avangin ṭul loah hlau thlabarin kan awm thei bawk. Heng hunah tak hian sorkar lamin an tih tur an hriat a ngai a, chu chu mipui hnena a tam thei ang ber zirtirna pek a ni.

Tun hnaia Mizo-rama Dengue vei an hmuh chhuah chungchangah hi chuan Health department lam hian an hna an thawk ṭha thawkhat a, mipui hnena zirtirna pawh ṭum dang aiin an pe ṭha niin a lang. Hei hi hun dangah pawh an tih fo tur a ni a, sorkar chuan a mipuite himna ngai pawimawhin zirtirna fel tak a pe tur a ni a, chanchinbu thuchhuak leh TV-a thusawite mai duhtawk loin, a taka feh chhuakin mipuite hnenah thil awm dan an hrilh
ṭhin tur a ni ang.