Periodic patta dilna leh dan

Tun hnaiah Kolasib khawpui huam chhung (Thingdawl), Bilkhawthlir town area leh Kawnpui town area-ah national highway (NH) no. 306, four lane-a siam turin a paltlang tura hriatah periodic patta diltu 165 an awm. Mizoram sorkar dan ang chuan, khawpui huam chhung (town area)-ah periodic patta pek phal a ni lo a; mahse, Kolasib district-a Settlement Officer (SO) chuan thu an hmuh avangin an lo hnâwl ngam lo. 

Mizorama thil ngaimawhawm tak zinga pakhat chu 'compensation dik lo' lak hi a ni a, hei hian kan ram nasa takin a tichhia tih a sawi ngam ang. Sorkar laipui aṭangin emaw, state sorkarin emaw project lian tham a neiha land compensation pek/ lak tur a awm hian kan sorkar thuneitu sangte leh an chhungte hnai hi an lo lang leh nual ṭhin a, hei hi kan ram ṭhanmawhbawk lian tak pakhat a tling. 

Sorkarin hma thar lak a tum a, chu chuan tute ram, huan leh lo emaw a pal tlang dawn a nih chuan a ram neitu hmasain zangnadawmna hi a hmu ngei tur a ni a, chu chu a dikna chanvo a ni. Nimahsela chutiang pawh ni lem lo, project lian a awm dawn tih hre hmasatu mi thiltithei deuhte'n project-in a huam tur chhungah ram an lei/nei chawp a, sorkar aṭanga zangnadawmna hui an tum ang hi chu thil fel lo tak a ni. 

Tun hnaia Kolasib chhehvela thil thleng mek hi eng tin nge sorkarin a kalpui zel dawn tih mipuiin an thlir reng dawn a, dan loa periodic patta dilna hi an hnawl ngam dawn nge an kal tlangpui dawn tih pawh mipuiin an en reng dawn a; mipuiin he sorkarah hi chuan dan ang taka thil kalpui an beisei tlat tawh dawn a ni.