MPF an ṭan mar a ngai

Mizoram People Forum (MPF) chuan tun hnaiah political party hrang hrang office tlawh kualin sorkar ṭha chungchang an aupui a, tun hnaiah Congress Bhavan-ah Congress party mite 'Sorkar inrêlbawlna ṭha' tih thupui an sawipui.

MPF awm hma leh awm hnua Mizorama inthlanna hrang hrang kalpui dan a danglam chak-zia hretu chu mipui-te kan ni a, a hre chiang bertu chu political party lam hi an ni hial awm e. Tun hmaa ualau taka pawisa sem, chaw ei khawm, huau huau siama tih khawm dur durte kha MPF awmna lamah chuan a awm ve ta meuh lo a, a ruka thil semte chu la awm bawk mah se MPF awm hma nen chuan a inthlau hle a ni.

Sorkar ṭha siam tura zirtirna an kalpui mei pawh hi beidawng loin huaisen takin aupui zel se, tunah a rah hmu nghal lo mah se hun rei deuh hnuah chuan nghawng ṭha tak a nei ngei ang. Kan ram kalphungah hian kan lung a awi lo tlang tih chu a chiang a, hei hi vawi leh khata thlak danglam vek theih a ni lo a, awmze neia au a, beih hram hram chuan mipui thinlung a hmin ang a, inthlak hun chu a la awm ngei ang.

MPF hian inthlan-na lamah hming chherin inthlanna felfai leh thianghlim zawk a awm theihna turin ṭan an la a, hei hi hna pui berah nei se a ṭha khawp mai. An hna pui ber kalsan loa thil dang an vei tel thei a nih chuan duhthusam a ni a, thil dang an tih belh avanga inthlan-na thianghlim nei tura an ṭan lakna lamin a tawrh erawh a thiang lo ang.

MPF-te hian ram siam ṭhatna turin huaisen takin ke pen zel se, a bik takin inthlanna lo awm tur hi thianghlim taka kalpui a nih theihna turin ruahmanna fel tak nen tun aṭangin ṭan la tawh se a ṭha awm e.