Mizote leh fanau enkawl

Aizawl District Child Protection Unit (DCPU) leh Child Welfare Committee (CWC) hotute chuan, kum 2012 aṭanga kumin October thla thleng khan CWC-in Mizoram pumah case 5,622 an chinfel tawh thu an sawi. Case zinga 451 chu pawngsual leh inkhuaikhemna lam a ni a, 271 chu taksa chunga hleilenna (physical abuse) niin, case 91 chu rilru hliam tuar (emotional abuse) an ni. Naupang ngaihthah 474, nu leh pa fate enkawl tlak lo case 662, ruih theih thila buai naupang puih ngai 54, fahrah 146, sorkar hnena fa pek 189, fa kalsan (abandoned) 108, child labour 29 leh naupang rûkbo case 24 a awm bawk.

Mipui nawlpuiin kan hriatpui lem loh hian Mizoramah ngei pawh naupangten harsatna lian tak an tawk mek a, heng zinga mi ṭhenkhat hi state pawn
aṭanga pem lut ni bawk mah se, Mizoram mi leh sa ngei pawh hi nu leh pa enkawlna mumal dawng lo tam tak an awm. Naupang kaihhnawih case heti zat a awm leh, naupang chunga hleilenna a hluar ta viau mai hi chhut chian a, inngaihtuah harh a hun takzet mai.

Mizoram chu mipat hmei-chhiatna rawng kaia naupang chunga hleilenna leh naupang khuaikhemah India ramah a sànglawr lak tih an sawi a, hei hi a lungchhiatthlak khawp mai. Sakhuana mit aṭanga thlir pawhin hei hi a zahthlakin a mawi lo takzet a, Mizo hnam anga ngaihtuah pawhin a runthlak hle a ni.

Mizoin Mizo nau-pang vek an khua-khem nasa hle tih phat rual a ni ta lo a, engkim mai chiang taka tarlan a ni ta. Hei vang hian nu leh pa pawh kan fimkhur a ngai a, mahni fa hrinte enkawl hman loha chhuahsan reng maite leh tute emaw kuta dah ringawt hi a him tawk lo thei hle tih hriat chian a
ṭha. Retheihna vanga naupang enkawl hman lo an awm ang chiahin hausak belh zel duh vanga fate chhuahsan reng mai an awm bawk a; a pawimawh ber chu nu leh pain fate tun aia nasa zawka an ngaihtuah hi a ni.

India rama hnam dangte hi fanau enkawl kawngah hian entawntlak tak tak an awm nual a, Mizo nu leh pate hian kan fate aia pawimawh a awm lo tih hriain mahni chhungkua ṭheuh enkawlna kawngah i ṭang thar ang u.