Mizoram Police leh inthununna
Mizoram Police Sports Meet hawngtu Home minister R Lalzirliana chuan, police zingah zu leh ruih theih thil dang vanga thi awm tawh lo se a duh thu a sawi a; police-te chu civil mi aiin an taksa a hrisel zawk tur a ni a, an fit reng tur a nih thu sawiin, "Taksa insâwizawi dan leh ei leh inah zirtirna dawng an nih avangin civil mite aia dam rei tura beisei an ni. Zu leh ruih theih thil vanga police mi leh sa thi awm tawh lo se ka duh a ni," a ti.
India rama police ṭha ber anga sawi
ṭhin Mizoram Police-te hian chanchin lawmawm lam hriat tur la nei reng mah se, chanchin duhawm lo pawh an nei ta nual mai. Police zingah ruihhloa fihlim lote, zu avanga an buai thute leh, ruihhlo tawlhruk thlenga police hming hriat tur awm tel tate hi a vanduaithlak takzet a ni.
Police awm sa siam ṭhat hi thil theih ni mah se a huphurhawm tawh a, Home Minister aṭanga thuneitu sang lam an ṭan mar a ngai. Police kal zel tur siam
ṭha tur chuan a lak dan aṭanga fimkhur a ngai a, dan ang thlapa sipai intlara intlar a, uluk taka tute mah insawipui thiang loa lak ni ṭhin se a ziaawm ang. Zep thu a cheng lo, tun hnaia police lak danah hian politics a inrawlh a, tling leh fel zawkte aiin hmelhriat leh duhsaktu nei lam an la nasa a, chumi rah chhe tak chu kan hmu mek a tih theih.
Tunah hian insiamṭhatna khua a la tlai lo a, police tihâwm takin physical exercise-te hi tun aiin uar se, hei hi inthununna atan leh hriselna atan pawh a pawimawh. Police ni si office tlai fote hi a inhmeh lo a, sorkar office ṭan hun tawha office kai tur tih hriat sa police officer liante motor hmuh tur awmte hian kan police inrelbawlna awm dan chu a hril chiang hle awm e.
Midangte’n inthu-nunna an lekkawh thei lo a nih pawhin police tal hi chu an danglam tur a ni a, hotu lian aṭanga bul ṭan a ngai. Police officer office kal tlai kan neih chhung chu inthununna a ṭha lo tihna a ni a, physical exercise kalpui tur pawhin hotu lian lamte tela ṭan an lak loh chuan a sawt mawh hle. Mizoram Police-a inthunnna khauh zawk lekkawh leh tur hian, police hotu lamin
ṭan la se, tih theih loh a ni si lo a.