AR biak-in hmunah fimkhur a ngai
GAD lehkhaah hian biak-in hmun chu August 8, 1952-a chhuah Assam Gazette Notification-in AR ram chhungah a rîn luh a nih thu te, The Mizoram (Restriction on use of Transferred Land) Act, 2002-in AR ram china a dah thu te, AR-in Mizoram sorkara a hlan chhâwn zinga mi a nih thute a lang. CYMA-in High Court-a petition a thehluhah a tel avangin court thutlukna a awm hma chuan neitua inchhâl theih nia a lan loh thute a lang bawk.
AR Kohhran biak-in hmun hi Mizoram sorkarin sorkara hlan lêt turin Synod hnenah a ngen niin a lang. Sorkar ngenna chu June 2025-a Synod Executive Committee ṭhukhawm chuan pawm loin, sorkara hlan a remti lo.
Mizoram Synod-in AR Kohhran biak-in hmun sorkara hlan a remti lo hian chhan ṭha tak a nei niin a lang. Biak-in hmun hi tun hma aṭang tawhin AR luah ramah a tel ngai lo a, AR zinga awm Mizo/Kristiante inkhawmna biak-in sakna atan kum 1950 hma lamah Bawrhsapin a pek, biak-in an sak pawh kum 1950-ah hawn a nia sawi a ni.
AR Kohhran biak-in awmna ram hi sorkar leh Synod ten an inchuh tihna a ni ta ber mai. Synod-in AR ram ni ngai lo leh kohhran ram anga a ngai hi a àwm viauah a ngaih theih. Sorkarin AR ramah ngaia sorkara hlan lêt tura Synod a ngen pawh a àwm viau tho; a chhan chu AR ramah a ngai miau tlat. AR luah ram chhunga mimal LSC neite pawh sorkara hlân turin a ngen a ni.
AR Kohhran biak-in hmun inchuhna hian nghawng a nei lian viau thei a, fimkhur a ngai hle dawnin a lang; mipui ngaihdan pawh a inang lo thei viau ang. Sorkar leh Synod lam hian rilru fím tak puin, fimkhur taka ngaihtuahin, ṭha takin indàwr zui zel se.
Hetih lai hian, AR Kohhran biak-in hmun chungchang hi politics-a inbeihna atana hmang pawl an awm ve mek bawk. Hei hi chu party leh sorkar intihmualpho tumna thil a ni thei a, mipuiin ménah an thlâk thiam a ṭha ang.