Ram leh hnam himna ngaih pawimawh

MZP hruaitute'n tun hnaia Sairang rêl chawlhhmun an tlawh a, duhkhawp loh eng emaw zat an nei. Rêl station-ah ILP nei loa relhrûk theihna hmun a tam an ti a, police an indaih loah an ngai a, rêla chuang zat leh ILP pek chhuah zat ngaihtuahin ILP nei loa bibo tam tak an awm ngeiah an ngai.

Sairang thlenga rél rawn lut hi thil thar a ni a, Mizoram ei leh bâr leh khawtlang nunah nghawng lian tak nei thei tur a nih avangin mi tam takin an ngaihven a, hun eng emaw ti chhung chu ngaihven a hlawhin a rinawm.

Khawvel ṭhang zel leh inkalpawhna hmanrua ṭha zel avangtein Mizoram pawh hnam dangin min chiahpiah tam tial tial lo thei lo a, chu chuan thil ṭha leh ṭha lo ken tel a nei zel. Heng thilte hi mipuiin kan hriatthiam a pawimawh.

Hmasawnna kan duh a, inkalpawhna chungchangah pawh hmasawn zel kan duh rual hian, ram leh hnam himna hi ngaih pawimawh zel a ngai a; chutiang tura pawl ṭhenkhatin hma an la hi a lawmawm a, theihtawp chhuah zui zel rawh se.

Sairang thlengin khualzin phur rêl a tlân tawh a, khualzin an rawn lut ruih ruih reng. Chutih laiin, rêl chawlhhmunte erawh a nih tur ang tak a la ni pha lo hle tih a hmuh theih. A nih tur ang taka zawh a nih thuai theih nan Railways lamin chak zawka hna an thawh a ṭul.

State sorkar pawhin a tih tur chinah tun aia chaka hma a lak a, changtlung zawka a thuam a ṭul. Rél station, a bikin Sairang station hi ṭha taka hung thuai a nih theih nan state sorkarin a ṭul angin Railways hotute nawr se ṭha ang.

Rêl hmanga rawn lut tam ber chu tourist angin ILP pek an ni. Mizorama an awmna chin vil zui a ṭul a, ILP an neihin a phal chin aia rei an awm leh awm loh pawh enfiah theih a ṭha. Thiamna a sang tawh a, hmanrua a ṭha tawh bawk a, thil tih theih a nih ngei a rinawm.

Mizoram sorkar hian kan ram leh hnam himna hi ngaih pawimawh berah neiin hma la zel se. Tuna hma a lak tawh chinah ṭha tâwk lo a awm a nih chuan bawhzui zel se, thawktu an indaih lo a nih chuan dah belh zel rawh se.