CM thusawi leh sorkar hna lak

Chief Minister-in October 10, 2025-a MSU inkhawmpui a hmanpuinaah, "Kalphung tharah chuan direct-a hna lak tur reng reng chu advertisement tel loa lak an ni tawh dawn lo a, chu'ng hmanga kan hna lak rêng rêng chu dah ngheh theih vek an nih tawh dawn," tiin a sawi.

Sorkar hna thawk tur laknaah advertisement chhuah zel a nih tawh tur thu a sawi hi a lawmawm a, ṭhalai, hna zawng mekte tan a lawmawm zual. CM-in a sawi ang ngeiin, sorkar hna thawk tur lakna rêng rêngah dan ang tak leh advertisement chhuah zelin kalpui ni ngei rawh se.

Tun hma, Mizo zinga lehkhathiam an tam hma chuan matric zo tawh phawt chuan sorkar hna an hmu deuh zel a, a hnu deuhah graduate apiangin sorkar hna an hmu deuh zel bawk.

Lehkhathiam an tam hnuah erawh chuan sorkar hnain lehkhathiam zawng zawng a daih lo hle. Tunah phei chuan pawl 10 pass-te'n an dil theih chinah pawh master degree nei eng emaw zatin an dil zel tawh. Sorkar hna nghet a hlut êm avang leh sorkar hna nghet hmuh a harsat em vang a nih a rinawm.

Hun rei tawh tak aṭang khan sorkar hna thawk tur laknaah induhsakna a nasa a, dan loa sorkar hna thawk tur lak leh duhsak zawngte thun a tam hlea sawi a ni ṭhin. Sorkar hotute bakah, sorkar officer liante'n an duhsak zawngte an thun nasaa sawi a ni ṭhin bawk.

Advertisement chhuah ngei leh inelna awm ngeia sorkar hna thawk tur laknaah pawh 'sawipuitu' neih ṭhat a ngai ṭhin. Hetiang a nih avang hian sawipuitu nei lo tan sorkar hnaa luh ve theih loh hiala ngaihna Mizo mipuiah a lian hman hle. Hei hian ṭhalai tam tak chu beidawnnaah a hruai lut niin a lang.

CM-in dan ang taka advertisement chhuah ngeia sorkar hna thawk tur lak zel a nih tur thu a sawi hi ṭhalaite tan thawk huaina tham a ni. Chief Minister thusawi hian ṭhalai lehkhathiam, sorkar hna beiseitute a tiphûr ngeiin a rinawm.

CM-in a sawi hi a hlawhtlinna a taka hmuh Mizoram mipuiin an beisei a; sorkar hna thawk tur lakna rêng rêng dik takin, dan ang takin, advertisement chhuah thlapin lâk zel ni ngei rawh se.