Zirlaite leh ṭhalaite tana hmalak

YMA, Champhai Vengthlang Branch hnuaia Education and Human Resources Development Committee chuan October 10, 2025 khan Champhai leh a chhehvela zirlaite tan intihsiakna, Vengthlang Mastermind an buatsaih a, an buatsaih vawi lina a ni.

Vengthlang Mastermind hi zirlaite competitive exam hmelhriattir nan leh inbuatsaih an thiam theihna tura buatsaih a ni. Hmun pathum laiah exam buatsaihin primary school aṭanga higher secondary school zirlai 651 lai an tel a, zirlaite chu optical mark reader sheet hmangin zawhna chhantir an ni.

Champhai Vengthlang YMA-in an veng chhunga naupangte hmakhua ngaia hmasawnna tura hma an la hi a lawmawm. An veng chhung chauh ni lo, Champhai khaw pumpui huapin an ti a, a hautak hlein a rinawm a, an ṭhahnemngaihna a chhuanawm hle. An thil tih hian rah duhawm tak a chhuah ngei a rinawm a, zirlai eng emaw zatin hma an sawn phah ngei ang.

Aizawl lamah pawh YMA branch ṭhenkhatin an lo ti tawh. Hetiang hi hmalakna ṭha a ni a, branch dangte pawhin entawnin ti ve thei se a duhawm. Hmasawnna tura mi thil ṭha tihte hi entawna tih ve mai ṭhin hi a pawi hauh lo a, a pawi lo mai ni loin, a ṭha zawk a ni.

Zirlaite hi kan ram hruaitu pawimawh tak tak la ni tur, ram innghahna an nih thu kan sawi ṭhin a, a dik chiah a ni. Tuna ram hruaina leh thil chi tinrenga hruaitute hun a liam ang a, tuna zirlaite hian kan ram leh hnam, kohhran leh pawlte hi an la hruai ngei dawn. Chuvangin, kawng dik an zawh a, hruaitu ṭha an nih theih nan tun aṭanga kaihhruaina ṭha nena enkawl a ṭul.

Zirna-ina zirna piah lamah hian hmasawnna tur leh hriat belh tur tam tak a awm. Kum tam tak chhung kumpuana 'Ram leh hnam humhalh' neitu YMA tan zirlaite hmasawnna tura hmalak hi ram leh hnam humhalhna ṭha tak a ni ngei ang. YMA branch hrang hrangte hian zirna leh a kaihhnawih thilah an huam chhunga zirlaite tan theihtawp chhuahin hma la thei se a duhawm.

Kohhran lam pawhin zirna leh ṭhalaite hma hun sialna lamah theihtawp an chhuah tawh ṭhin a, hma an la nei zel bawk a; tun aia nasa zawkin hma la zel bawk se.

Zirna hi lehkhathiam chher chhuahna ringawt ni loin, kawng tinrenga hmasawnna, khua leh tui ṭha chher chhuahna a ni a; ruihhlo leh nun kawng dik lo laka invênna ṭha tak a ni bawk.