Ram hruaitute indawr zawk thei se

Mizoram DGP ruahmanna angin tun hnai khan Kolasib district-a Mizoram police hotute leh ramria Assam police hotute chu Silchar-ah an inkâwm a, ramri chungchangah thawhho an rêl. Inter-District SP Level Joint Coordination meeting-ah hian ruihhloa sumdawnna te, state pahnih inrinna vela dan bawhchhiatna te, ramri vanga innghirnghona thleng theite leh ramria lirthei chesual leh ruang chhar ṭhin chungchang­ah te thawhho theih dan tur an sawiho. 

Tun hnaiah kan police hotu lamte'n ramriah dan leh thu­pek khauh zawka kenkawh a nih theihna turin ruahman­na an siam a, SP level-ah Assam lama mite nen an inbia hi a lawmawm hle. Hei hian ramria buaina chhuak thei ven kawngah te, ruihhlo leh sorkar phal loh tawlh ruk tur ven leh hnam leh hnam inkara buaina chhuak thei ven kawngah thui takin a pui ngei ang. Hetianga police hotu lamin a nachang hriaa ṭhenawm state an be pawp hi a lawmawmin an remhriatna pawh a fakawm. 

Hetihlai hian Assam-a district pakhata sorkar mi chhawrte (government official) hi kan dawr ta fo a, Cachar district-a DC-te pawh kan sorkar official-te nen hian an indawr tawh ṭhin. Sorkar hnathawkin an tih theih chin chu kan hre ṭheuh a, dan leh thupek kenkawh a ni ber. Mizo mipuiin kan ngaimawh leh enghelh ber pakhat ramri chungchang hi chu an khawih thei lo. Anni lam hi chuan ramria buaina chhuak palh thei chu an veng thei mai thei a; nimahsela ramri buai chinfel kawngah chuan ram hruaitute tel lo chuan an che thei meuh lo.

Kan ram hruaitute hian awmze nei tham turin ramri chungchangah hian Assam lam hi kan la dawr mang lo a, anni lam lahin a khat tawkin, "Kan ram chhung," tia council of minister meuhin a pawm chhungah hnuhma an rawn nei deuh reng. Hei mai hi a ni lo a, "Kan ram," tia kan ram hruai­tute'n an pass tak hial chhungah hian Assam lam mi an la khawsa hnem hle a, Assam-ah chhiah an pe a, Assam sorkar hmun hrang hrangte pawh a awm a, tun hmaa an khawsak dan ngai rengin an la khawsa zui a ni. 

Ramri buaina chingfel tur chuan ram hruaitu an indawr a ngai. Kan ram hruaitute'n Assam lam hi be tura ruahmanna an siam ngam a ni loh chuan, Assam lam zawk hi chuan min biak an tum kher lo thei a, kan ram hruaitute'n ramri chungchanga Assam an biak 'ngam' hun hi a nghahhlelhawm.