Social media-a thu dik lo tihdarh
MJA, Serchhip District-in October 13, 2025-a silver jubilee an lawmnaah Chief Minister-in, mi tinin thu thehdarhna hmanrua an kawl tawh avangin thu leh hla a darh nasa a, thu dik leh dik lo hriat hran a har ṭhin thu leh, mite ngaihtuahna hruai sual thei thu thehdarh a tam tial tial thu a sawi.
Home Minister pawhin youtuber tam takin maksak tak takin, journalism ethic ngaihtuah miah loin mipui an hrût tih sawiin, "Inkaihhruai sualna lamah kan kal chak phah hle. He media siper hian kan politics khawvel pawh a tikhawlo nasa ta em em a ni," a ti.
Social media-in khawvel a rûn a, Mizote pawh min rûn. Social media hi mi tam takin ṭangkai taka an hman laiin, thu dik lo thehdarhna leh thil ṭha lo tihna atana hmang mi tam tak an awm ve bawk; hetah pawh hian Mizote kan bâng lo.
Social media-a thu dik tâwk lo a darh nasa lutuk te, mi tam takin media/journalism ethic (inkaihhruaina) hre lo leh hre duh lo lui tlat chunga thu leh hla leh thlalakte an thehdath ṭhin hi mi tam takin an vei a; kan ram hruaitu lu ber berte pawhin an vei hle tih a lang.
Mizo zinga tam tak chuan social media hi thil ṭha lo tihna atan te, mi beihna atan te, mi tihmualpho tumna atante hman an tum niin a ngaih theih a; chung zingah chuan political party mi leh sate hi an langsar zual a tih theih.
Politics-a inbeihna atana social media hman ṭangkai tumtu tam tak hian Zo nun ze mawi kan tihte hi engahmah an ngai lo ni hialin a lang. Kristian ni chung siin Kristian nun mawi an ngaihtuah lo a, mihring mihrinnaa mawi leh mawi lo pawh an ngai pawimawh duh lo niin a lang bawk. Hengte avang hian social media hmangtu tam tak hi chu Mizo nun mawi tichhetuah an ngaih theih hial ang.
Social media hmanga sum lak luh tam duh luat vanga mawi leh mawi lo pawh dáwn loa thil tih ṭhin hi sim a hun tak zet. A bik takin youtuber-te hi Mizo nunphung tichhetu leh mipui rilru hruai sualtu ni lo turin fimkhur mawlh teh se.
Mizo mipuite'n social media-te hi a ṭha zawnga kan hman theih nan nasa lehzualin inzirtirna uar thar sauh sauh a ṭul bawk.