Sorkarin kawngpui ngaihsak rawh se
All NGO's Mamit leh Commercial Vehicle Association, Mamit chuan Mamit-Aizawl, Mamit-Bairabi leh Mamit-Zawlnuam kawngpuite lirthei tlân hleih theih loh khawpa a chhiat lutuk avangin heng kawngpuite hi vawiin aṭangin dan an tum.
Mizoram mamawh tinreng lak luhna kawngpui pawimawh Kawnpui leh Khamrâng inkar kawng pawh tun thlengin a la chhe hle zel a; gas leh tuialhtheite a thlen ṭhat loh phah mek a ni.
Mizorama kawngpui zingah ṭha tak tak a awm a, chhe tak tak a awm bawk. Kawngpui pawimawh tak tak hmun tam takah a chhe em em reng mai hi chu a zialo tak zet.
Tlawmngai pawlte'n sorkar nawrna atana kawngpui an dan ngai khawpa kawng a chhe nasa hi a zialo hle. Kawng dan hi mipuiin an tuar ngei ang a, kawng dan hma pawhin kawng chhia avangin an tuar nasa tawh tho.
Mamit district mipui tawrhna hi sorkarin a ngaihven vat a ngai a, kawng chhe zual lai tal thawm ṭhat a nih theih nan chak taka hmalak a ṭul. Kawng dan a nih loh nan leh mipui tawrhna tiziaawm turin kawng thawm ṭha tura hmalak nghal a ngai.
Kawngpui chhe lutuk zinga ṭhenkhat chu state sorkar enkawl a ni a, ṭhenkhat chu NHIDCL enkawl a ni. Kawng chhiate chu NHIDCL enkawl pawh ni se, state sorkar hian a ngaihthah tur a ni lo a, a kut a sil thiang lo; Mizoram chhung, Mizo mipui khawih a nih avangin a ngaihven tur a ni.
Kawngpui-Khamrang kawng hi sorkar hotute'n an ngaihsak ṭha tâwk lo nia ngaih theih tak a ni tawh. Nikumah nasa takin a chhia a, kuminah pawh nasa takin a chhe leh a, tun thlengin a la chhe viau reng.
Mipui leh pawl aṭanga nawrna a nat lai chuan sorkar hotu, minister leh official ten an ngaihven hluai a, kuminah phei chuan sorkar lai MLA-te a inchhâwkin ni tin an inviltir hial. State sorkarin hma a lak tak tak chuan NHIDCL lam pawhin nasa zawkin ṭan an la tih a hmuh theih a; state sorkar hmalaknain awmzia a neihzia a tichiang.
Mizoram hmasawnna tura pawimawh ber pakhat chu kawngpui a ni. Sorkar (ministry) hmingṭhat leh mualpho pawh kawngpui ṭhat leh ṭhat lohah a innghat thui hle. Sorkar hian kawngpuite hi tun aia nasain a ngaihven a ngai a, mutmawh hnàrmawhah nei rawh se.