Zûk leh hmuam sim leh fimkhur

National Tobacco Control Programme chhinchhiah danin, sorkar kum liam ta April 2024 - March 2025 chhung khan Mizoramah puipunna hmuna mei zu mi 444 man an ni.

Vaihlo zûk leh hmuam khapna dan ṭha tak a awm tawh a, dan hmangin thuneitute'n mei zù an vâi ṭhin. Kum 2024-25 chhungin phal lohna hmuna mei zù an awm leh awm loh vawi 418 endik a ni a, chu'ng aṭang chuan puipunna hmunah mei zu mi 444 an man a ni.

Tun hma chuan meizûk hi Mizo nunah thil mawi lo a ni lo hran a, puipunna hmunah an zu mai a, mitthi lumenna in chhungah pawh an zu ṭhin. Ngaimawh a ni ngai lo a, ngaimawh an awm pawhin an tilang ngai lêm lo.

Tunah erawh chuan meizûk khapna dan a awm a, mei zûk phal lohna hmun tam tak a awm. Phal lohna hmuna mei zûk chu dan anga hrem theih a ni ta. Vaihlo zûk leh hmuam ṭhat lohzia kan hre chiang tial tial a, ṭhangthar zingah chuan zûk leh hmuam ti an tlem tial tialin a lang; hmasawnna lawmawm tak a ni.

Mipui awm tamna leh puipunna hmuna meizûk hi tunah chuan a mawi lo tak zet tawh a, puipunna hmun ni chiah loah pawh, hmun azirin mi hmuha meizûk hrim hrim pawh mawi lo a ni tawh. Mei zu ṭhinte an fimkhur hle a ngai.

Mei zu ṭhinte an fimkhur a ngaih piah lamah sorkara thuneitute'n meizûk chungchanga dan bawhchhiatna an vil ṭhat a ngai; tun aia chak zawkin hma la se, ngawrh lehzualin phal lohna hmuna mei zu an awm leh awm loh vai ṭhin se a duhawm.

Vaihlo zûk leh hmuam chungchangah hian inven sên a ni lo a; zûk leh hmuam hi hriselna tichhetu, natna thlentu a ni tih hriaa sim hi a pawimawh lai a ni. Vaihlo zûk leh hmuam hian cancer leh natna dang dang a thlen tih finfiah a ni tawh a; chuvangin, sim tum a, sim tura theihtawp chhuah a pawimawh.

Mei zu ṭhinte an fimkhur lehzual a ṭul a, mei zûk khu hi mi dang tan rimchhia leh mi hriselna tichhe tel thei a nih avangin meizûk sim thei lote'n mi bul hnaia zu lo turin fimkhur se a ṭha hle.