Tourism-ah awmze neia hmalak

Sports & Youth Services leh Tourism depatrment-te changtu Minister chuan October 16, 2025 khan Delhi Mizoram House-ah press conference neiin, nakkumah Aizawl International Half Marathon lian leh ropui zawk buatsaih tum a nih thu a sawi. Half Marathon-ah hian tel tur leh Mizoram tlawh turin India ram mipui a sáwm a ni.

Tourism Minister-in Delhi-a a awm lai remchangah laa sum leh pai sên belh loa press conference a nei leh, chumi hmanga Mizoram tlawh tura India ram mipui a sâwm hi a ṭha hle mai a; India ram mipui zingah Mizoram hriat phah ṭhahnem tak an awm ngei ang.

Mizoram hi hnam dang khualzinte tlawh atan a sitawm loh a, a sitawm lo mai ni loin, tlawh manhla tak tak tur ṭhahnem tak a awm. Khualzinte'n state danga an tlawh ṭhin hmun tam tak aiin Mizorama hmun mawi tak takte hi a mawiin a nuam zawk mah. Chutih laia tourist kan la ngah tâwk loh chhan chu, khualzinte'n Mizoram an la hriat tâwk loh vang a nih a rinawm.

Tourist-te hi economy dinhmun siamṭhatu pakhat a ni. India ramah pawh hmun eng emaw zatah chuan khualzinte hi tualchhung mite eizawnna innghahna a ni a, khualzin an ngah avangin eizawnna ṭha tak nei mi tam tak an awm. Chutiang chu Mizoram leh a mipuite pawh hi kan la ni ve thei ngei ang. A pawimawh hmasa chu - mipuiin Mizoram an hmelhriat a, tlawh an châk theihna tura awmze neia hmalak a ni.

Mizoram rawn tlawhtu khualzin tam se, khualzinte aṭangin Mizoram mipuiin sum tak zawk hai lut se kan duh laiin, khualzinte'n Mizoram an hriat theihna tur leh Mizoram tlawh an châk theihna tura inpho lan erawh kan thiam tâwk lo a; inpho lang turin sum sên kan harsat ṭhin bawk.

India ram mipuiin Mizoram an hmelhriat theih nan tourism lam buaipuitute'n awmze neia hma an lak a ngai. Phai lam media-te pawh hman thiam a ṭha a, chuta tan chuan sum sên huam a ṭul hun a awm ang. Khawpui lianahte advertisement tih pawh inhuam ila, national media lianahte pawh sum sênga advertisement tih a ṭul hun a awm ang.

Hetih rual hian, sum sêng tam lêm lo pawhin social media hmangin Mizoram hi khawvel mipui hmuhah pho chhuah theih a ni a; chutiang tur chuan awmze nei taka hmalak leh taimak a ngai a ni.