AR chhuahsan ram hman dan tur

Aizawla Assam Rifles chhuahsan ram hman zui dan tur ngaihtuahtu Advisory Committee on AR Land chu October 16, 2025 khan Chief Minister hoin an ṭhukhawm a, ruahmanna hrang hrangte an hrual mûm ṭan niin a lang.

AR chhuahsan ram chhunga thil awm turte puanzar a ni tawh a, mipui tana ṭangkai tur thil eng eng emaw dah/siam tura ruahman a ni. Ruahmanna thar ber ang chuan, ram zawng zawng aṭanga 39.33% chu mipui mamawh hmunhma siamna atan hman tur a ni a, 60.67% chu green area a ni dawn thung.

Lammual chhehvela AR-in an chhuahsan tak hmun hman zui dan turah mi tam takin media hmangin an duh dan leh ngaihdan te an puang chhuak tawh. Ngaih pawimawh zawng a inang lo a, awm tura duhte leh duhthusamte a inang vek lo.

Advisory Committee on AR Land hi CM leh sorkara mi pawimawh tak tak te, pawl hrang hrang aiawhte telna a ni a; anni pawh an duh dan a inang vek bik loin a rinawm. Duh dan inang lo nuaih karah hian inpawm tawn thiam a pawimawh.

AR chhuahsan ram hman dan tur leh, awm tura tihte ruahman chungchangah hian Committee member-te an lungrual kim lo mai thei a; awm tura tihte zinga ṭhenkhat chu member ṭhenkhat chuan an duh lo viau thei. Mahse, Committee-ah chuan a tam ber duh dana kal a ni ṭhin tih hriat reng a ṭha.

Chutiang bawkin, awm tura a tih zinga ṭhenkhat chu mipui náwlpui zingah ṭha ti lo leh duh lotu mi eng emaw zat an awm ang. Ṭha kan tih hi miin ṭha min tihpui kher lo thei a, ram leh hnam tan a ṭha ber kher lo thei bawk tih hriat tel a ngai.

AR chhuahsan ram hman zui dan tur ngaihtuahtute zingah hian mi chi hrang an kim thawkhatin a lang a, chuvang chuan, an thutlukna chu kan ram leh hnam, Aizawl tana ṭha tur a ni ang tih pawm thiam a ṭul awm e.

Ngaihdan leh duh dan inang lo karah mipui náwlpuiin pawm rual tlân theih deuh erawh a awmin a rinawm a, chu chu AR chhuahsan ram hman dan tur ngaihtuahtute'n an thlir thiam a, an ngaih pawimawh a ṭha. Mipui mar dek reng chungin, uluk leh fimkhur taka an ngaihtuah a, thutlukna an siam chhoh zel a ngai a ni.