Lehkha chhiar uar chho zel ila

Mizoram Writers Association chuan October 9-16, 2025 chhung khan Aizawlah Lehkhabu Pho Rûnpui an buatsaih a, mi 124-te kutchhuak lehkhabu ṭhahnem tak tlâwm zawka lei theih tura pho chhuah a ni.

MWA-in Lehkhabu Pho Rûnpui an buatsaih ṭhin hi a lawmawm a, mipui pawhin an hlut thawkhat niin a hriat. Ni sarih chhung Lehkhabu Pho Rûnpuiah hian lehkhabu chi hrang hrang Rs 10,11,733 man hralh a ni a, a lawmawm hle.

Hun eng emaw ti chhung chu Mizo zingah lehkha chhiar taima an tlema sawi a ni a; lehkhabu hralh a tlahniam a, chanchinbu chhiar an tlem chho a, chanchinbu tam tak a tàwp phah tawh. A chhan ber nia lang chu - electronic media, internet, digital media leh a dangte ṭhang zel vang a ni.

Mizote'n lehkha kan chhiar tlem tawh tih hi sawi a ni fo a, ṭhalaite kan mawhpuh deuh bik ṭhin. Ṭhalaite sawi an ni bik ṭhin hi a àwm viau a, mahse, ṭhalaite chauh an ni bik lo, nu leh pa, kum lama upa deuh tawhte zingah pawh lehkha chhiar taima tak an tlem tial tial tho.

Hetih lai hian, tun hnaiah Mizo zingah lehkha chhiar an pung thar leha sawi a ni a, lehkhabu siamtute pawhin an hralh ṭha leh deuh tawha sawi a ni. Kumin leh kum hmasa lawka Lehkhabu Pho Rûnpui leh book fair dang buatsaih ṭhinte pawh mipuiin an hlut leh ta viau. Mizo mipuiin lehkha chhiar kan uar leh deuh ta hi a lawmawm tak zet a, hmasawn zawnga kalna a ni.

Tunlaiah internet hmangin kan hriat duh apiang hriat theih a ni deuh ber tawh a, zirnaa hriat tura mamawhte pawh hmuh zel theih a ni tlangpui tawh. Chutih rualin, internet aṭanga hriatna leh thiamna zawn hi hriat reng a har zawk a, lehkhabua chhiar hian hriat a nghet a, hriat reng a awl zawka sawi a ni. Chuvangin, hriatna leh thiamna tak tak nei turin lehkhabu leh zirlaibu ngei hi hman ṭangkai zel theih a ṭha.

Mizo mipuite'n lehkha chhiar uar thar zel ila, lehkha chhiar hi finna leh hmasawnna hnâr a ni tih hi i hre thar zel ang u. Chutiang bawkin, ziakmite pawh ṭang thar zel se, Mizo mipuiin lehkhabu ṭha chhiar tur an neih zel theih nan ṭan han la zel teh se.