Dan anga sum inthawn a pawimawh

Singapore-a hna thawka awm Mizo eng emaw zatte'n an chhungte hnena pawisa an thawn tur chu Mizo hmeichhe pakhatin a tichingpena hriat a ni a, tichingpentua puh chu October 13, 2025 khan Mizoram Police-in an man.

Mizo Diaspora Cell tarlan danin, Singapore-a hna thawk mek Mizo eng emaw zatin an chhungte hnena dan ang taka pawisa thawn dan an thiam lo. Chuvang chuan thawn man tam lo têa thawnsak theia insawi hnenah thawn turin an dah a, chu chu tihchingpen a nia hriat a ni. Pawisa thawnsak thei nia insawi hnenah pawisa an pek chu cheng nuai 300 vel lai a tling.

Singapore-a hna thawk Mizo ṭhenkhatte harsatna tawh aṭang hian chhungte hnena pawisa thawn chungchangah fimkhur a ṭulzia a lang. Sum hi mi tam takin harsatna leh buaina an tawh phahna, an mualpho phahna a ni a, mi ṭha tak nia langte pawh sumah an rinawm lo thei tih hriat a ṭha.

Mizoram páwn, India ram chhung leh páwnah hna thawka Mizo ṭhalaite an inzar pharh zel hi a ṭha a, an chhungte ngaihsak taka sum an thawn ṭhin pawh a lawmawm. Mizoramah hnain ṭhalaite'n a daih vek lo a, kan ṭhalaite state pawnah an la chhuah zel a ṭul ang.

Hetih rual hian, chungte hnena sum thawn danah fimkhur a ngai hle tih a hriat. Dan anga sum inthawn a him ber a, dan loa inthawnna chu awlsam zawk pawh ni se, tih loh theih a ṭha. Dan ang taka sum inthawn dan hriat a ngai tihna a ni a, chutiang tur chuan inzir a, tih peih a ngai tihna a ni.

Mizoram páwn, a bikin ram danga hna thawka awm Mizote fimkhur zel se la, Mizorama an chhungte pawhin fimkhurpui zel se. Sum leh paiah an fimkhur a ngai tak zet a, chumi piah lamah chuan nun danah pawh fimkhur a, Mizo nun mawi tak lan chhuahtir tum tlat ni se.

Chhan hrang hrang vanga Mizoram pawna awmte ṭanpuina tura Mizoram sorkarin Mizo Diaspora Cell a din hi a lawmawm. He Cell hian a din chhan ang takin state pawna Mizote tan theihtawp chhuah zel se. Chutih rualin, dik lo taka intihmualpho tuma hmalaknate awm thei a nih avangin fimkhur erawh a ngai ang.