Campaign laiin dan bawhchhe lo ila
Mizoram Chief Electoral Officer chuan Dampa biala MLA by-election neih tur kaihhnawihah Model Code of Conduct (MCC) bawhchhiat vanga an hnena zualko an la awm loh thu a sawi a; complaint tur neite chu cVIGIL mobile app hmang ṭangkai turin a ngen.
November 11, 2025-ah Dampa MLA by-election neih a ni dawn a, candidate-te leh political party tinte ngawrh takin an campaign mek a, an ṭang hle ang. An ṭan em em karah MCC bawhchhiaa inpuhna te, MCC bawhchhiat vanga Election thuneitute hnena inhêk a la awm lo hi a lawmawm.
Inthlan a hnai tial tial dawn a, political party-te leh candidate-te pawh an ṭang na tial tial dawn. Ṭan lutuk avangin MCC bawhchhiat palh emaw, hre reng chunga bawhchhiat luih emaw awm thei a ni. MCC bawhchhiatna a awm chuan thuneitute hnena thlen zel mai a ṭha a; mobile phone aṭangin awlsam taka zualko theih a ni bawk a, complaint thehluhna app cVIGIL hmang ṭangkai mai a ṭha hle ang.
Dampa bial inthlan tur hi complaint awm miah loa zawh theih a duhawm hle mai a, chutiang tur chuan Election lama thuneitu te, political party te, candidate-te leh mipuite hi ṭan tlan a ngai. By-election chuhtu political party leh candidate tinte dan bawhchhe lo tura an fimkhur a ṭul a; thianghlim takin, Mizo Kristian tih awm rênga mawia an campaign a ngai a ni.
Election hotute pawhin ngun taka mit lêna beng an chhit reng a ngai a, complaint lutte an enfiah zung zung a pawimawh. Hrem ngai an awm a nih chuan duhsak bik leh hlauh bik nei loin huaisen takin an hrem ngam tur a ni.
Hetih lai hian, intihmualpho tum hrim hrim vanga dan bawhchhe miah si lo, dan bawhchhia anga inpuh te, thu dik famkim lo hmanga inhêkte pawh awm ve thei a ni. Rilru chhia pu lo tlang ila, dik chu dik, dik lo chu dik lo tih hi kan rilru puthmang ni thei se. Election hotute lam pawhin thil nihna tak hre chiang tura ṭan an lak zel a ngai ang.
Inthlanna felfai, thianghlim leh zalen kan nei ṭhin hi India rama Mizoram hmingṭhatna a ni fo. He kan hmingṭhatna hi Dampa by-election awm turah pawh hian vawng nung zel ila; fimkhur takin, rilru ṭha tak puin, dan huan chhungah zel ṭan lak tlân a ṭul e.