Leivûng paih fimkhur a ṭul tak zet

PHE department-a Engineer-in-Chief chuan tun hnaiah mipui hnena ngenna leh hriattirna a tichhuak a, Aizawla tui sem tur duh anga a tam tâwk loh chhan a sawifiah.

PHE E-in-C tarlan danin, Aizawla tui sem tur a tam tâwk loh chhante chu - lei chêin Greater Aizawl Water Supply Scheme Phase-III pipe a tihchhiat vang te, ruah a sûr apiangin tihfim theih loh khawpa Tlawng lui tui a nut ṭhin vang te, tui a nut chhan chu Tlawng lui fintu lui tê hrang hranga mipuiin leivûng an paih vang leh kawng laihna leivûng paih vangte a ni.

Aizawlah duh ang taka tam tui pump theih a nih loh chhante en hian, mihringin harsatna kan insiam a ni tih a hmuh theih a, a zialo hle. Lei chêin pipe line a tihchhiat hi chu khuarel chhiatnaah a ngaih theih a; leivûng paih vanga tui nu lutuk erawh chu mihringte'n keimahni tan harsatna kan insiam tihna a ni - thil âtthlak takah a ngaih theih.

Leivûng paihin Tlawng lui leh hmun danga luite a tihnut nasatzia hi vawi tam tak sawi a ni tawh a; mahse, tun thlenga kan la harh chhuak thei lo hi a pawi. Mi tam tak chuan a awlsam zawng leh sum sên tlemna tur ngaihtuahin an duh duhna hmunah leivûng an paih mai ṭhin a, leivûng paih khap ni ṭhin mah se, paih lui an awm zel tho.

Duh duhna hmuna leivûng paihtute hi a rûka thil ti an ni a, a ruka thil tih tum tlat hi chu invên sên a ni lo. Chuvangin, mi tin hian dan leh thupek kan ngaih pawimawh a, kan zawm ṭhat a ngai.

Dan zawm ṭhat a nih loh hian mi dang tan harsatna a thlen ṭhin bakah, mahni ngei pawhin harsatna an tawh phah thei a, chu chu leivung paih chungchangah pawh a thleng dik mek. Leivûng paih tur nei zawng zawngte mahni leh mipui tana harsatna thlen lo tura an chêt a ṭul.

Kawng laihna vûngte kawng thlanga nawr liam mai ṭhin hi lui tui tinutu leh Aizawl mipui tana harsatna thlentu lian tak a ni bawk. Kawng laitute'n Tlawng luia tla thla tura leivûng an paih tawh loh nan na zawka hmalak a, khuahkhirh a ṭul ta tak zet a ni.