Kawngpui danchah leh a behbâwm

Kolasib district-a lirthei enkawltu pawl ṭhenkhat chuan October 23-26, 2025 chhung Kolasib district chhungah kawngpui dan an tum a; kawngpui dan hi sorkarin a remtih loh avangin kawng dan tumtu zinga mi 25 chu police-in an man.

Kawngpui dan tumtu police-in an mante hi police station lock-up-a hun eng emaw chen dah an nih hnuah, kawngpui dan zui an tum loh avangin thubuai ziak lut loin chhuahtir an ni. Inman avanga thubuai ziak lut kher lo a, inbiakremna hmanga chhuahtir an ni hi a lawmawm.

Mizoramah kawng hrang hrang a chhe em em a, a zialo tak zet a; mipui an khawngaihthlak a, lirthei enkawltute an khawngaihthlak lehzual.

Kawng chhiat lutuk vangin mimal emaw, pawl angin emaw, tlân duh lo an awm a nih chuan an thu a ni a, mi dangin sawi theih an nei lem lo. Mahni tlan duh loh vanga kawng a chhe viau chunga tlân duhte dan kher erawh thil dik a ni lo.

Tihluihna hmanga mi dang, mipui tam zawk tawrhtir kher hi a ṭha lo a, mi tana harsatna leh buaina thlentu mai a ni. Mi dang duhsakna ai mahin, mahni hmasialna leh thuneihna lantir tumnaah a ngaih theih hial ang.

Democracy ramah chuan lungawi lohna lantir a thiang a, India ramah tih a ni fo. Lungawi lohna lantir dawn hian uluk taka ngaihtuah hmasak a ṭha a, mi tam tak tan harsatna thlen thei a nih ṭhin avangin fimkhur a ngai.

Mizorama mipui tam zawkin harsatna an tawh lohna tur zawka sorkarin kawngpui dan tumtute lakah hma a la hi a ṭha a, tun hnu zelah pawh mipui náwlpui tana ṭha tur ngaihtuah chungin a ṭul hunah chuan huaisen taka hma lain dan kengkawh ngam zel rawh se.

Mizoram hmun eng emaw zatah kawngpui a chhe viau a, a pawi em em; Mizoram châk lak luhna ber a chhe em em mai hi a pawi lehzual. Ruahtui a hul chho ṭan a, ruahtui a hul veleha kawng siam nghal thei turin mawhphurtute'n chak takin hma la se la; kawngpui a ṭhat zawk theih nan theihtawp chhuah mawlh teh se.