Social media-a politics inbeihna

MNF president chuan tun hnaia Mizo Hnam Runa a thu­sawinaah, social media-ah ṭawngkam ṭawp pui pui nen dik lo taka beih a tâwk nia sawiin, "Police-te'n an han chhui a, pahnih chuan ngaihdam min dil tawh nghe nghe," a ti a, an party mite chu mi beihnaah an tuang tichhah turin a chah. 

Tun hnaiah khaw­vel hmun dangte ang bawkin Mizoramah pawh mipui nawl­puiin social media kan hmang ta a, hei hian thil ṭha tam tak a thlen rualin thil ṭha lo pawh a keng tel. Social media ken tel ṭha lo tak pakhat chu dawta mi puh leh thu dik lo hmanga midang beihna hi a ni a, politics huang chhungah hian hei hi a zual niin a lang. 

Politics-a hamṭhatna duh vanga politician-ten thu dik tawk lo an sawi ṭhin hi mipuiin an ngaimawh a, an sawi loh leh an intiam ang ni loa an khawsa zui fo hi mipui zah lohnaah ngaih theih a ni. Chutih rualin mipui lam pawhin mahni kuta thu puan chhuah theihna social media kan ban phak ta fur a, kan politician-te kan sawisel fo leh duh loh dawta inpuh kan ching a nih chuan a fel lo takzet a ni. 

Social media hman danah hian politi­cal party tite an inenfiah a ngai takzet a. Kan party worker-te chet dan leh thu thehdarh duh danah hian eptu lam an ni emaw, roreltu lam pawh ni se hmasawn an ngai tlang hle a ni. Kan party min beihna kan duh lo ang bawk hian kan lam ṭangten midang an beihna hi kan ngaimawh tel tur a ni ang. Social media a ni emaw, eng media kal tlang pawha dawta inbeih hi a Mizo lo a, a Kristian hek lo a, hemi kawngah hian kan inzir a ngai takzet a ni.