Social media leh ṭawngkam hman

Chief Minister chuan October 22, 2025 zan khan YMA Inkhawmpui Lian vawi 75-na, Sakawrdaiah thu a sawi a; internet leh social media-ah Mizo ṭhalai tam takin ṭawngkam an duhtui loh thu sawiin, social media-a ṭawngkam hmanah chintâwk nei thiam turin mipui a chah.

Mizo mipui náwlpuiin social media kan hmang tawh. Mi tam tak chuan an rilrua awm angte an sawi pawp pawp mai a, ṭawngkam mawi lo leh uchuak tak tak hmang ṭhin pawh an tam. Hei hi veiin CM-in YMA Inkhawmpui Lianah a sawi chhuak a, ṭawngkam hmanah chintâwk nei thiam turin Mizo mipui a chah a ni ber.

CM thusawi hi mi ṭhenkhat chuan politics thila amah beih nan an hmang zui a; an thu a ni a, an duh danin an sawi zui ni maiah ngai ila. CM-in a sawi chhuah chhan nia lang - Mizo zingah mi tam takin social media-ah ṭawngkam hman an duhtui loh thu leh, chintâwk neih tura mipui a chah erawh a pawimawh em em.

Social media hi a ṭangkai ngei mai a, mi tam tamin an hmang ṭangkai rêng bawk. Mahse, hnam pumpui a nghawng tawh dan leh a la nghawng zel dan tur ngaihtuahin, hnam hian social media-te hi a ṭhatpui lo zawk em maw ni aw, tia ngaihtuah theih a ni.

Internet khawvelah leh social media-ah te hian hnam dang zingah pawh ṭawngkam duhtui lo tak tak, ṭawngkam chhe tak tak hman ching an tam niin a lang. Ṭawngkam chhe tak tak hman hi internet leh social media-in a ken tel chi khat pawh a ni mai thei.

Hnam dangte'n social media velah ṭawngkam chhe tak tak an hmang a nih pawhin, Mizote chuan hmang ve kher lo ila a duhawm. Mizote hi tun hma aṭanga nun ze mawi nei ṭhin, rinawm leh hawihhâwm, mi dangte véngthâwng tak ṭhin kan ni a, chu ze mawi chu internet leh social media kan hmannaah pawh kan lantir a ṭha.

Social media vela ṭawngkam kan hman tam tak hi chu hmachhana inbiaknaa kan hman duh loh tur leh kan hman ngam loh turte a ni. Ṭawngkam mawi lo ṭhenkhat chu inngamtlak vanga fiamthu paha sawite pawh a ni ang; mahse, social media-a kan sawi (comment)-te hi mi tam takin an hmu tawh a ni tih hriain, kan fimkhur a, kan uluk a ngai a ni.