Sakhuana leh politics

BJP, Mizoram Pradesh chuan thuchhuah siamin, sorkar laipuiin prime minister Atal Bihari Vajpayee chawimawi nana a pian champha, December 25 chu Good Governance Day atana kum 2014-ah puang mah se, Mizoramah chuan hman a ni ve ngai dawn lo niin an tarlang.

Good Governance Day hi Krismas ni chiah a ni a, Kristian tam tak chuan he ni kher Good Gover-nance Day atana an thlan chhan hi Atal Bihari Vajpayeen chawimawina lam aiin Hindu lam âwntu political party-in sakhaw dang nêk a tum vang niin an puh.

BJP kan hmelhriat dan leh kan ngaihdan hi eng ang chiah nge tih hriat kim theih loh mah se, hun rei tak chhung kha chu Hindu sakhaw tibiktute party angin kan ngai. Tunah chuan Mizoramah bu an rawn khuar ṭan a, zawi zawiin an insawh nghet a, sorkar laipuiah ro an rel bawk nen Mizo zingah pawh BJP nih hreh lo mai ni lo hruaitu nih inchuh tham mi zahawm tak tak an awm ta.

Mizoram BJP lam chuan, "Hun lo kal zel turah pawh December 25-ah Good Governance Day kan hmang ve ngai dawn lo tih Zoram mipuite min hriatsak turin kan puang a ni," an ti a, hei hi an hotute thu rel kalhna a ang hle. Chhut chian erawh chuan he ni hi Mizoramah hian lawm tum eng ang pawh ni se sorkar chawlh a ni a, a lawm tur mipui an inhmu kher lo ang.

Sakhuana leh politics hi an chawm pawlh tawh chuan thil buaithlak hi a tam ṭhin hle. BJP pawh hi Hindu sakhaw chawi larna tur hman-rua anga kan puh tlat a nih chuan chumi nena sawi zawm theih thil tam tak an ni tawh. Hindu sakhaw zuitute party ni loin a duh apiang tel theih a ni a, he party zawm hi sakhaw dang tan a hlauhawm lo, tiin a chhunga chengte chuan an sawi ve thung ngei ang.

Engpawhnise hun lo kal zel turah Mizoramah hian sakhuana leh politics hi chawm pawlh lo ila a ṭha ber a, Kristian-te pawhin kan politics-a Kristian zirtirna a taka lalut si loa a langa mawia kan sawi uar lutukte pawh hi inennawn ila; politics fim tak, dikna leh rinawmna nena sorkar ṭha din duhna thinlung pu chunga kalpui hi chu sakhuana nena chawhpawlh politics ai chuan a thlanawm zawk e.