Eirua inpuh tawn

Minister pakhat chuan Cong-ress party kaihhruai Mizoram sorkara thuneitute eirûk lakah an fihlim thu a sawi. Hei hi MNF hruaitu leh minister hlui pakhat chuan thu belhchian dawl lo a nih thu a sawi zui a; hei hi chhangin Congress party lam chuan a sawitu MNF hruaitu chu eirukna chungchang sawi ngam tur a nih loh hial thu an sawi.

Congress minis-ter hian tuna sor-kar hruaitute chu ei-ruknaah an hming-chhe lo a, sorkar an enkawlnaa eiruk avangin buaina an tawh loh thu a sawi chhuak. Hetia huaisen taka a sawi chhan hi minister-te leh an thawhpuite hi mualpho taka eirukna thila man leh tihhmingchhiat an nih loh vang pawh a ni ngei ang.

Hemi chhangtu MNF minis-ter hlui sawi dan erawh chuan Congress hruaitute chu vai con-tractor-te nen thui taka inrem-siam a, mipui hriat si loha corruption kalpuiah a puh. Congress kaihhruai sorkar chu hnamdang contractor hna thawk ṭha lo pawh hau ngam lo khawpa heng mite nena inthlunzawm angin a puh thung.

MNF vice president thusawi an chhan letnaa Congress ṭhalai lam thuchhuah hian ngaih-tuah a tithui viau bawk a, eirukna thil a nih chuan he MNF hruaitu hi thu-sawi ve ngam tur a nih loh thu an sawi. Hemi awmzia chu tun hmaa minister a nih chhungin eiruknaah a fihlim lo tia an puhna a ni ber mai.

Politics-ah chuan mahni khingpuite hi an inpuh chhe tawn ṭhin hle a, na tak takin an insawisel ṭhin. Tun ṭumah hian kan political party lian pahnihte eiruah an inpuh tawn ve ve a, hei hi thil thar ni lo mah se hetiang thu inchuh ngaihthlak reng mai hi mipui tan a ninawm zozai tawh hle a ni.