Mizoramah chi bila hmalak loh

Kumina YMA Inkhawmpui Lian, Sakawrdaiah neihah October 22, 2025 khan rorel a ni a; rorel zingah, "Zo hnahthlak chi pêng hrang hrang Mizorama chengte zingah chi bil hmalakna a awm tawh loh nan Central YMA-in hma la rawh se," tih a tel.

Mizoramah chi bil anga hmalakna a awm lohna tura YMA-in hmalak a rel hi a lawmawm a; ṭha takin bawhzui a ni turah ngai ila, Mizoram leh a chhunga chengte tana ṭha zawk tur a nih a rinawm.

YMA rorel hi an rêlna rilru tak hre vek lo mah ila, chi bil anga Mizorama kohhran pawl thar din a kâwk deuhin a rinawm. Chi bil leh kohhran kai kawpa Mizorama chi bil kohhran din zel hi thil ṭul lo, Zo hnamte inpumkhatna kawng dâltu lian tak a ni thei.

Sakhua hi rinna leh thlarau khawih thil a nih avangin inthlaktir har tak a ni a, awmna kohhran inthlaktir pawh harsa tak a ni bawk. Hetiang hi a niih avangin, sakhua leh kohhran chungchangah hian hriatthiamna thui tak neih a ngai. India Danpui bawhchhiatna leh mihring inrahbehna thlen thei a nih avangin, sakhaw chungchanga rin dan leh dikna chanvo rahbehna a thlen loh nan fimkhur a ṭha.

Mizo zingah chi péng hrang hrang a awm a, chu'ng hnam pêng hrang hrangte chu inlungrual duh vek kan niin a lang. Kan inlungruala kan inpumkhat zawk theih nan Zo chi pêng hrang hrangte hi 'Mizo' tihah hian lungawi vek thei ila a duhawm.

Mi ṭhenkhat chuan Mizo tih hi Lusei ta bikah an ngai a ni mai thei a, mahse, Mizo hi Lusei ta bik a ni lem lo. Mizo hi Zo hnahthlak pêng zawng zawng lenna leh telna tur a ni tih hi thinlung takin pawm vek thei ila; hei hi Zo hnahthlak pêng hrang hrangte lungruala kan inpumkhat theihna tur ṭha ber a nih a rinawm.

YMA rorel angin, Mizo hnamte kan inpumkhat zawk nan Mizoramah chi bil anga hmalakna a awm loh nan hnam pêng tinte'n ngaihtuahna thar pú ila; YMA pawhin an rorel hi chak taka bawhzuiin hma han la teh se.