Kau-Tlabung leh Tuipanglui thubuai

Kau Tlabung Mini Hydel Project (MHP) leh Tuipanglui MHP thubuaia Aizawl District & Session Judge thutlukna siam chu Mizoram sorkarin Gauhati High Coourt, Aizawl Bench-ah khinlêt a tum. Kau-Tlabung MHP leh Tuipanglui MHP thubuaiah hian Special Judge (PC Act) chuan October 27, 2016 khan thutlukna a puang a, eiruknaa inhnamhnawiha puhte chu thiam a chantir.

He thubuai kal dan-ah hian thil hriatthiam harsa tak tak a awm a, a tirah Mizoram sorkar hian thubuai neite hi thiam chantir a tum ran emaw tih turin thil a kal. Tunah an thiam lohna an finfiah theih loh avangin thubuai tihtawp a ni ta a; nimahsela sorkar lamin he thutlukna hi a khing let leh dawn niin a lang ta.

Sorkar hian eng angin nge he thil kal vel hi a ngaih tih hi hriatthiam a harsa khawp mai a, hetia Aizawl District & Session Judge thutlukna a khin dawn takah chuan Kau Tlabung Mini Hydel Project (MHP) leh Tuipanglui MHP-ah hian thil fel lo awmin a ringhlel ni ngei tur a ni.

Thubuaiah hi chuan finfiahna (evidence) a awm loh chuan thil kalpui a harsa a, thuhretu (witness) neih ṭhat a ngai bawk. Hengte hi sorkar lam aṭang lo chuan hmuh an harsat hmel si a, sorkar hian tun aia
ṭan a la nasa deuh a nih loh chuan a hmaa thubuai tihtawp ang deuh bawk hian a tawp leh lo ang tih sawi a har hle.

Engpawhnise he thubuaiah hian sorkar hian mipui hmuha thiam channa atan a hmingin a khinglet mai mai lo turah ngai ila, a thil hriat leh
ṭan chhan neih ṭhat avangin he thubuai tihtawp takah hian thil fel lo a awm ngeia an ngaih vangin an khing let dawn a nih hmel. Mipuiin Kau Tlabung Mini Hydel Project (MHP) leh Tuipanglui MHP hi fiah lo ruaiin an hria a, thil awm dan dik tak hriat chian a nih theihna tur talin sorkar hian ṭan han la teh se.