Inpumkhatna

Central YMA huaihawtin tun hnai khan Lammualah Joint Cultural Meet buatsaih a ni a; YMA bakah, Central Young Lai Association leh Mara Thyutlia Py (MTP) aiawhte an tel a, hnam lam leh zai chi hrang hrang entir a ni.

Mizorama tlawm-ngai pawl lian pa-thumin inpum-khat-na lam hawia ṭan an la thar hi a lawm-awm takzet a, hei hi chhunzawm zel theih ni se a ṭha ang. A thlenna hmun pawh Aizawlah chauh ni lo se, kum tin tlawmngai pawl hrang hrangte hian inthlen chhawk thei nghe nghe se a ṭha awm e.

Mizote hi kan zavaiin awm khawm pawh ni ila kan tam tham loh tehlul nen, khawvel ram hrang pathumah hlawm lian tak takin kan awm a, India ram chhunga chengte pawh state hrang hrangah kan awm darh bawk. Hei mai hi a ni lo, Mizoram chhunga chengte ngei pawh kan ṭawng hman a inan loh vangte leh kan chenna hmun avangtein kan inpawh danah duhthusam lote pawh a awm zauh zauh ṭhin.

Khawvel a ṭhang zel a, hnam leh chi inlak hran duhna leh mahni hnam leh chi chawisan duhna hi a lian lo thei lo. Hei vang hian kan zavaia chenhona leh inpumkhatna tichhe zawnga rilru kal fawr leh inlak hran duhna hi awm lo se, Mizoram chhunga mite chu inlungrual takin khawsa tlang ila, rilru inpawh takin i awmho zel ang u.

Mizo zawng zawng pawh hi ṭang rual ila kan chhehvel hnam tam takte aia kan tlem tawh tehlul nen, inpumkhatna tichhe zawng chuan tumahin ke i pen lo ang u. Central YMA-in Joint Cultural Meet a buatsaih hi a lawmawm a, hei hi a tawpna ni loin chhunzawm zel theih ni se, rah duhawm tak a chhuah ngei a beiseiawm.