Lirthei chuan man sang lutuk hi
Transport Director chuan October 22, 2025-a Tourism Stakeholder Consultative Meeting hawnnaah, lirthei chuan man leh hman man chu kum thum danah ennawn ṭhin a nih thu leh, tunah hian ennawn tura inbuatsaih mek a nih thu a sawi. Hmun dang nena khaikhinin Mizoramah lirthei hman/chuan man a san bik thu a sawi bawk.
Mizoramah mihring phur chi lirthei hrang hrang chuan man a sang bik hle tih hi mi tin hriat a ni. Rate a san bik chhanah Mizoram kawng a chhuk chhoh vang tih chhuanlam a awm a, motor part to bik vang tih a awm bawk. Hengte hi a dikna chen a awm a; chuti chungin Mizorama mihring phur chi lirthei hrang hrang chuan/hman man hi a sang lu deuh.
Mizoram dinhmun hre rengin thuneitute'n lirthei chuan man leh hman man an bituk ṭhin. Sorkarin rate a bituk chu lirthei neitute tana a àwm tâwka hlâwkna awm chunga mipui tana rit lutuk lo tura siam a ni.
Sorkarin rate a bithliah pawh a san thawkhat viau tawh laiin, lirthei tam takin rate bithliah aia sang féin passenger-te aṭangin pawisa an la ṭhin; taxi (ke hnih nei leh ke li nei) leh auto-rickshaw ten an ching zualin a lang.
Passenger-te aṭanga sorkarin rate a bituk aia sang fêa pawisa lak hi tihtawp theih ni se a duhawm hle; sorkara mawhphurtu, thuneiutte'n ṭan an lak lehzual a ngai a ni.
Rate bituk aia sanga chuan man late chu thuneitute hnenah thlen turin mipui an lo hriattir tawh ṭhin. Hei hi mipui lam hian an zâwm ṭha tâwk lo niin a lang a; mamawhnain a nan tawh vang leh inhêk hreh vang a ni thei ang.
Lirthei chuan man sang lutuk chungchangah hian sorkara thuneitute hian mipui aṭanga complaint dawn kher an nghak em ni chu aw tih tur a ni. Mipui aṭanga complaint dawn nghâk ringawt lo leh, complaint dawn chauh bawhzui loin, thuneitute hian passenger phur lirtheite'n rate bituk an zawm leh zawm loh endik ve ṭhin rawh se.
City bus, taxi, auto-rickshaw leh a dangte hi sorkarin phalna a pek ang leh an intiam anga lirtheia sumdawng an ni. Sorkarin rate a siamte leh thil dangte zâwm tura 'ka intiam e' tia hming ziah hnan thlap an nih avangin, sorkar rate ang taka tlan hi an tihmâkmawh a ni.