Buhfai phurh buaina

Mizoram Carrying Contrac­tors Association (MCCA) leh Mizoram Truck Drivers Asso­ciation (MTDA)-te inkara thu inhmu lo avangin tun hnaiah MTDA-te chuan buhfai an phur duh lo a; Food, Civil Supplies & Consumer Affairs (FCSCA) minister hmalakna zarah MTDA-te chuan an nawrh titawpin hna an chhunzawm leh ta. 

MCCA leh MTDA-te buaina hi mi­pui nawlpuiin an hriatthiampui loh thil ni mah se, he thil hi a nghawng a nat em avangin chin fel ngei ngai buaina a ni. Mizorama kan buhfai ei tur phurtu ber MCCA leh a taka lirtheia phurtute an inhmu thiam lo a ni a, tun hma pawha lo buai zauh zauh tawh an nih avangin thil chinfel ṭul tak chu a ni chiang mai. 

An buaina hi FCI kudam (food storage depot) aṭanga buhfai phurh hmasak dan tur indawt (serial number) leh hlanthlak (unload) hmasak dan indawt enkawl/ ruahman chungchang a ni a, a hre chiang ve loin pawn lam aṭanga lo sawipui chiam theih pawh a ni lo ang. Chum piah lamah court thlengin thil a kal tawh a, he buaina chingfel diak tur hian hun a la duh deuh dawn pawh a ni mai thei a, a pawimawh ber chu mipuiin an tawrh loh a ni ang. 

Minister-in mipui tawrh theihna tur hriaa a inrawlh hi a lawmawm a, MCCA leh MTDA lam pawhin thiamthu sawi tur nei ve ve dawn mah se mipuiin an tawrh theih tur khawpa thil a kal tawh chuan an inphahhniam tlan a hun tawh a ni. Pawl pahnih inkar buainain mipui a nghawng lohna tura buaina chinfel hlen dan ngaihtuah a ṭul takzet a ni.