Inpumkhatna rilru pu thar ila

October 31 hi Rashtriya Ekta Divas (National Unity Day) a ni a, Ram Inpumkhatna Ni tihna a ni. Unity Day hi India ram inpumkhatna tura nasa taka hma latu Sardar Vallabhbhai Patel pian champhaah kum 2014 khan hman ṭan a ni a; India ramah inpumkhatna pawimawhzia puanzar nan leh inpumkhatna tura inhlan tharna ní atan hman a ni ṭhin.

India ram hi hnam leh ṭawng hrang za tam takte awm khawmna a ni a, khawvelah hnam hrang leh ṭawng hrang awm tamna ber ram a ni hial mai thei. Hnam hrang leh ṭawng hrang tam takte awmna ram a nih avang hian mipuite inpumkhatna a pawimawh tak zet. Inpumkhatna leh inunauna ṭha awm lohnaah chuan zalen taka khawsakho a harsa ṭhin a, mipui nun a nuam thei lo.

Mihring nunhonaah hian inpumkhatna, inunauna leh inlungrualna ṭha a pawimawh em em a, hengte hi ram nuam ni tura pawimawh ber berte a ni. Ram changkang tak pawh a chhunga chengte an inpumkhat loh a, innghirnghona leh inhuatna a awm chuan ram nuam a ni tak tak thei lo.

India ram hi hnam hrang hrangte leh ṭawng hrang hrang hmangtu te, sakhaw hrang hrang zuitute awm khawmna a nih avangin inpumkhat a pawimawh lehzual a; India sorkar pawimawhin a ngai pawimawh em em a, inpumkhatna ni bik a siam hial a ni.

Mizoramah pawh hnam hrang leh ṭawng hrang eng emaw zat kan awm khawm a, sakhaw hrang hrang zuite kan ni a; inpumkhatna ṭha tak nen lungrual taka kan chênho a pawimawh. Mizorama hnam dangte hi Mizote hian kan hmusitin kan diriam tur a ni lo; ṭhiana kan siam zawk a ṭul. Hnam dang an nih vanga huat nghal ngawtna rilru phei chu put loh tawp a hun tawh.

Zo hnahthlak hnam pêng hrang hrangte inkarah leh kohhran pawl hrang hrangte inkarah pawh inpumkhatna ṭha a pawimawh em em. Zo hnam pêng dangte leh kohhran dangte tana ngaihthlak nuam lo thei ṭawngkam hmang lo tura inven a ṭul a, diriam zawng leh hmusit zawnga ṭawng leh chêt phei chu tih loh tawp tur a ni.

National Unity Day lo thleng hi India ram, Mizoram leh kan khua leh veng ṭheuhah mipuite kan inpumkhat a ṭulzia min hriat thartirtu ni se; inpumkhatna tura rilru kan siam tharna ní ni mawh rawh se.